Horta atribui medalla méritu ba médiku Xineza 12

DILI, 24 outubru 2023 (TATOLI) – Prezidente Repúblika, José Ramos-Horta, fó medalla méritu no diploma rekonsiliasaun ba pesoál médiku Xina na’in-12 tanba sira-nia kontribuisaun esepsionál ba dezenvolvimentu setór saúde Timor-Leste nian.

“Rekoñesimentu ida-ne’e sai hanesan símbolu ba apresiasaun ne’ebé kle’an ba sira-nia dedikasaun no servisu”, Horta dehan liuhosi nia intervensaun, bainhira entrega medalla ba médiku Xineza hirak ne’e iha Palásiu Prezidensiál, ohin.

Nia rekorda, hahú kedas hosi akordu kooperasaun entre Repúblika Demokrátika Timor-Leste ho Repúblika Populár Xina iha Governu Konstitusionál Timor-Leste nian ba dahuluk, Xina sai nu’udar apoiante ida-ne’ebé metin ba setór saúde Timor-Leste nian.

Apoiu ida-ne’e hahú ho ekipa médika dahuluk ne’ebé mai iha fulan dezembru 2003, hodi marka momentu importante ida iha jornada saúde Timor-Leste nian.

Durante tinan barak, pesoál médiku Xineza hamutuk 123 mak dedika aan hodi servi Timor-Leste.

Ekipa Médiku Xina nian ba da-9 ne’ebé kompostu hosi pesoál médiku 12, nunka kole hala’o atividade médiku oioin durante tinan rua nia-laran.

Sira hala’o papél importante iha área espesializada oioin inklui kardiolojia, urolojia, operasaun jerál, obstetrika no jenekolojia, ortopedika, anestezia, reabilitasaun TCM, enfermeiru, ai-moruk kuidadu intensivu no radiolojia.

Sira-nia susesu hahú desde sai pioneiru ba sirurgias laparoskópiku to’o introdús tékniku médiku inovativu sira.

Nota partikulár mak estabelesimentu Sentru Nasionál Litotripsia Timor-Leste, hodi fornese servisu urolojiku esensiál ba komunidade.

Introdusaun teknolojia monitorizasaun Holter no monitorizasaun ambulatóriu ba presaun raan priénse ona lakuna krítiku sira iha servisu saúde nian.

Iha esforsu kolaborativu ida, ekipa ne’e mós envolve ativamente iha inisiativa sıra ba kapasitasaun, formasaun ba profisionál saúde lokál sira iha teknolojia médika avansadu sira, hodi asegura sustentabilidade ba sira-nia impaktu.

Aleinde sira-nia papél fundamentál iha Ospitál Nasionál Guido Valadares, Ekipa Médiku ida-ne’e la’o liu no la’o maka’as liu, hodi hala’o vizita ba tratamentu médiku gratuita ba suku sira ne’ebé remota.

Liuhosi esforsu hirak-ne’e, sira to’o ba iha pasiente 3000 liu, iha área remota sira, ne’ebé sei hasoru dezafiu sira iha asesu ba kuidadu médiku.

Ekipa ne’e mós fahe ai-moruk gratuita, hala’o diagnóstiku kona-ba Aimoruk Tradisionál Xina (TCM) liu 250, no fornese relatóriu X-ray 270 iha sentru saúde oioin iha Timor-Leste, hodi hatudu dedikasaun ekipa nian ba kuidadu saúde ne’ebé komprensivu.

Médiku hirak ne’ebé simu onra hosi Prezidente Repúblika mak hanesan.

1. Liu Yabin, Departamentu Radiolojia, Ospitál Afiliadu dahuluk iha Chengdu Medical College
2. Xie Yunfeng, Departamentu Urolojia, Ospitál Povu Primeiru iha Neijiang
3. Zhang Ke, Departamentu Operasaun Jerál, Ospitál Sichuan Cancer
4. Liang Xiaobo, ICU, Southwest Medical University Afiliated Hospital
5. Zhang Min, Departamentu Obstetrika no Gynekolojia, Ospitál Povu Deyang
6. Long Hua, Departamentu Anestezia, Ospital Povu Segundu Deyang
7. Zheng Maowen, Departamentu Enfermeira, Ospital Povu Provinsionál Sichuan
8. Zeng Hao, Departamentu Ortopédiku, Ospitál Neijiang ba Aimoruk Tradisionál Xina
9. Wen Lianbin, Departamentu Kardiolojia, Ospitál Povu Provinsionál Sichuan
10. He Lingna, Departamentu Acupuntura, Universidade Chengdu Traditional Chinese Medicine University Affiliated Hospital.
11. Pan Meiling, Departamentu Saúde Sentru Komunikasaun Internasionál Sichuan
12. Xu Xigui, Departamentu Saúde Sentru Komunikasaun Internasionál Sichuan.

Notísia relevante : Foun: Médiku Xineza 12 to’o ona TL fó asisténsia ospitalár ba pasiente sira

Ekipa médika xineza 12 konklui ona misaun iha Timor-Leste 

Jornalista: Hortencio Sanchez

Editór : Zezito Silva