COVALIMA, 24 outubru 2023 (TATOLI) – Komandu Polísia Nasionál Timor-Leste (PNTL) munisípiu Covalima koloka ona membru na’in-ida ka rua ba kada sentru votasaun hodi asegura eleisaun suku iha 28 outubru.
“Ita prepara ajente seguransa ne’ebé kada sentru votasaun ita destaka na’in-rua hodi fó seguransa ba prosesu eleisaun”, Komandante PNTL Covalima, Superintendente Polísia Calisto Gonzaga, hatete iha Santa Rosa.
Sekretariadu Tékniku Administrasaun Eleitorál (STAE) Covalima kria sentru votasaun bazeia ba aldeia iha munisípiu hamutuk 148. Ajente PNTL inklui ho komandante munisípiu hamutuk na’in-148 mak sei garante eleisaun no hetan mós apoiu husi nasionál ne’ebé destaka nia membru 40.
STAE sei distribui materiál eleisaun suku durante loron rua, entre 26 no 27, ba postu administrativu Fatululik, Fatumea no Zumalai, Suai, Maucatar, Tilomar no Fohorem.
Totál eleitór husi munisípiu Covalima ne’ebé mai husi postu administrativu sira hamutuk 49.469, kompostu husi mane – 25.220 no feto 2.4216.
Notísia relevante: STAE Covalima aluga viatura hodi transporta materiál eleisaun bá postu administrativu
Jornalista: Celestina Teles
Editora: Maria Auxiliadora