DILI, 24 outubru 2023 (TATOLI) – Sekretáriu Estadu Arte no Kultura (SEAK), Jorge Soares Cristóvão ho ekipa hasoru malu ho Ministru Interiór (MI), Francisco da Costa Guterres, Sekretáriu Estadu Protesaun Sivil (SEPS), Domingos Mariano Reis no Komandante Jerál Polísia Nasionál Timor-Leste (PNTL), Komisáriu Henrique da Costa, hodi ko’alia kona-ba autoridade seguransa bele asegura Festivál Fronteira ne’ebé sei hala’o iha tempu besik.
“Objetivu hosi sorumutuk ne’e hodi halo koordenasaun ba parte seguransa no servisu migrasaun nian, hodi apoiu Festivál Fronteira 2023 liuhosi Interkámbiu Kulturál hodi promove rekonsiliasaun ne’ebé sei realiza iha novembru ni- laran iha Munisípiu Bobonaro”, hatete iha komunikadu ne’ebé Agência TATOLI asesu hosi media MI, ohin.
Festivál ne’e hala’o hodi hametin nafatin lasu amizade entre Timor-Leste no Indonézia ne’ebé sai nu’udar instrumentu pás nasaun rua nian.
Iha ámbitu enkontru, Ministru Francisco Guterres, apresia tebes ho programa Festivál Fronteira 2023 no ministru orienta ona Komandu Jerál no Servisu Migrasaun atu fó apoiu totál ba atividade refere.
Festivál Fronteira tuir oráriu sei hala’o iha 15-18 fulan novembru iha Munisípiu Bobonaro no sei partisipa mós hosi Autoridade Nusa Tengara Timur (NTT).
Jornalista: Hortencio Sanchez
Editór : Zezito Silva
