VIQUEQUE, 25 outubru 2023 (TATOLI)—Xefe suku Uma-Uain Leten, postu administrativu Viqueque Vila, munisípiu Viqueque, Martinho Soares Gusmão, ne’ebé rekandidatu ba xefe suku períodu 2023-2030, hakarak kria dezenvolvimentu integradu iha suku.
“Ha’u rekandidatu ba Xefe suku tanba ha’u hakarak husu apoia komunidade atu kria dezenvolvimentu integradu hanesan iha área edukasaun, saúde, agrikultura no área sosiál iha suku Uma-Uain Leten,” Martinho Soares Gusmão, hateten ba Agência Tatoli, hafoin ramata halo diálogu ho eleitór sira, iha sede suku, kuarta ne’e.
Martinho komprometidu sei kria mós ligasaun ho parseiru sira hanesan organizasaun naun govermentál (ONG) lokál, nasionál no internasionál hodi halo dezenvolviementu iha suku ida-ne’e.
“Ita hakarak dezenvolvimentu tama iha suku, ita presiza hetan tulun hosi ita-nia parseiru sira. Ha’u sei koopera ho parseiru no igreja sira hodi lori povu ba vida espirituál no moris di’ak,” nia akresenta.
Notísia relevante : Xefe suku Uma-Uain Leten husu joven sira kria pás iha eleisaun komunitária
Eleitór iha suku Uma-Uain Leten hamutuk 380 maka fó apoia ba nia hodi rekandidatu ba Xefe suku.
“Ha’u-nia kandidatu ne’ebé ba rejista iha meza asembleia suku foin lalais ne’e, ho eleitorál apoiante hamutuk na’in-380 maka fó kbiit ba ha’u hodi rekandidatu ba Xefe suku, ne’ebé kumpre ba rekezitu 1%, eleitór 16 hosi eleitór iha suku Uma-Uain Leten 1.623,” atuál líder komunitária informa.
Suku ne’e iha kandidatu rua mak sei konkorre iha eleisaun, hanesan Pedro da Costa no atuál Xefe suku, Martinho S. Gusmão.
Iha fatin hanesan, eleitór Uma-Uain Leten, Santiago Lemos, agradese ba atuál Xefe suku ne’ebé iha interese rekandidatu, nune’e kompromete sei nafatin kria kolaborasaun hamutuk ho povu.
“Karik eleitu fali ba Xefe suku, nafatin hatudu badinas no kolaborasaun hamutuk ho ita-nia povu sira,” nia hato’o.
Tuir dadus, eleitór iha suku Uma-Uain Leten kompostu hosi aldeia hitu hanesan Bahauai iha eleitór 263, Baria 199, Cailoibere 262, Lialura 115, Macalaco 329, Retika 166 no Tutucui 199.
Jornalista : Vitorino Lopes da Costa
Editora : Julia Chatarina
