DILI, 25 outubru 2023 (TATOLI) – Diretór Nasionál Farmasia no Médikamentu iha Ministériu Saúde (MS), Delfim da Costa Ferreira, hatete Ministériu Saúde haruka tan aimoruk item lima ba Therapeutic Goods Administration Austrália (TGA) hodi halo teste ninia kualidade.
”Item lima ne’ebé ita haruka ba iha TGA atu teste nia kualidade mak hanesan dexametaxone 4mg, ibuprofen tablets BP 400mg, Zincell syrup 120ml, Mucorid syrup 120ml no epivec 1mg/1ml injection”, Delfim informa iha Hotel Novo Turismu, ohin.
Nia esplika, aimoruk item lima ne’ebé MS haruka ba ona iha loron 19 outobru, espera katak fulan dezembru bele hetan ona rezultadu.
“Ita haruka ba iha loron 19 fulan outubru ne’e, ita espera fulan dezembru ne’e ita bele hetan fali rezultadu”, nia relata.
Aimoruk hirak ne’e, MS foti hosi Institutu Nasionál Farmasia Produtu no Medikamentu (INFPM) no mós foti iha klínika privadu iha Dili laran.
Jornalista : Felicidade Ximenes
Editór : Zezito Silva
