DILI, 25 outubru 2023 (TATOLI) – Ministériu Saúde (MS) husu orsamentu adisionál ho millaun $14, iha Orsamentu Jerál Estadu (OJE), tinan 2024.
Ministra Saúde, Elia dos Reis Amaral, dehan razaun husu adisionál tanba sei finansia programa prioridade tolu hanesan aumenta rekursu umanu, fasilidade saúde no mós finansia programa fortalesimentu institusionál.
“Tuir pakote fiskál ne’ebé mak fó ba Ministériu Saúde hamutuk miliaun $57, ne’e foku ba prestasaun saúde iha ita-nia rain. Bainhira ami husu adisionál ne’ebé hetan ona aprovasaun hamutuk millaun $14”, Ministra Saúde, hateten hafoin aprezenta OJE 2024, iha Komité Revizaun Orsamentu, iha Auditoria Ministériu Finansa, Aitarak-laran, kuarta ne’e.
Nia dehan, relasiona ho aumenta rekursu umanu mak ministériu planeia atu koloka profisionál sira iha postu saúde no sentru saúde sira ne’ebé sei menus, hodi bele presta servisu di’ak liután ba komunidade.
Programa prioridade MS nian iha tinan 2024 maka asegura disponibilidade imediata ba ai-moruk hotu ne’ebé ospitál no sentru saúde sira presiza. Hadia saúde materna no saúde infantil, mellora nutrisaun infantile, harii no reabilita infraestrutura no fasilidade saúde.
Hadia prestasaun kuidadu médiku iha Hospitál Nasionál Guido Valadares (HNGV) liuhosi aumenta espesialidade oioin hanesan pediatria, onkolojista no espesializada sira seluk tan no mós tékniku espesializadu sira.
Taxa ezekusaun OJE 2023, Ministériu Saúde atinje ona 75,3% hosi totál orsamentu alokadu $ 68,599,746.00.
Jornalista : Felicidade Ximenes
Editór : Zezito Silva