PR husu sidadaun hotu tenke proteje no kuidadu grupu vuneravél
MANATUTU, 25 outubru 2023 (TATOLI) - Prezidente Repúblika, José Ramos Horta, husu ba ema hotu atu kuidadu no proteje ema vuneravél sira bainhira mosu dezastre naturál.
“Iha situasaun barak ne’ebé akontese ema ho grupu vuneravél sira ladún hetan apoiu adekuadu hodi hakman sira nian sofrimentu iha dezastre ruma, tuir dadus ne’ebé ha’u iha hatudu katak iha mundu pursentu 16 ema ho nesesidade espesiál no ema vuneravél sira iha impaktu moris iha risku nia-laran, ho razaun fundamentál ida-ne’e mundu tomak deside atu tau atensaun ba grupu ida-ne’e”, Dokumentu Prezidente Repúblika José Ramos Horta nian ne’ebé lé sai hosi Xefe Kaza Sivil Prezidénsia Repúblika, Jesuina Maria Ferreira Gomes, iha serimóna komemorasaun loron mudiál ba reduzaun risku dezastre naturál, ne’ebé halo iha Suku Cribas Manatutu vila, kuarta ne’e.
Nia dehan, relasiona ho tema katak promove partispasaun grupu vuneravél sira hanesan ema ho nesesidade espesiál idozu feto no labarik sira iha redusaun risku ba rejilénsia moris di’ak nian iha Timor-Leste.
Tema ida ne’e, enkoraza nasaun hotu iha mundu inklui Timor-Leste atu bele fornese atendimentu hanesan ba ema hotu inklui grupu vuneralvél sira, tanba ne’e, tenke promove nafatin partispasaun komunidade sira liuliu grupu ne’ebé vuneravél atu sira labele hela iha kotuk.
Tuir Xefe Estadu José Ramos Horta katak ho aproximasaun komunidade nian mak sai hanesan liña frente, sé akontese dezastre ruma, komunidade ho komunidade mak ajuda malu mak foin Governu no parseiru sira nian tulun.
“Ha’u hakarak hato’o de’it mensajen katak agora ne’e ita muda ona hosi aprosimasaun tradisionál ba aprosimasaun baze ba komunidade, dala barak akontese dezastre ruma, ema hothotu fihir ba Governu saida mak Governu bele halo, maibé komunidade agora tenke servisu hamutuk entre komunidade ho Governu no parseiru sira hodi halo mitigasaun no prevensaun ba risku dezastre”, nia dehan.
“Mai ita hotu servisu hamutuk hodi kontribui tuir idak idak nian kna’ar atu ajuda malu bainhira akontese dezastre iha Timor-Leste”, nia revela.
Prezidente Repúblika kongratula komisaun organizadora SEPS, Administradór Munisípiu Manututu ho parseiru sira seluk ne’ebé bele organiza eventu komemorasaun loron redusaun ba risku dezastre naturál iha Manantutu tinan ne’e.
Jornalista: Natalino Costa
Editór : Zezito Silva
