DILI, 25 outubru 2023 (TATOLI)–Servisu jestaun merkadu Taibesi no Manleuana laiha fasilidade hanesan komputadór no mákina impresaun ba serbisu administrasaun.
“Ha’u-nia departamentu ne’e rasik mós laiha kondisaun no fasilidade atu halo servisu administrasaun. Halo relatóriu mós susar, emprime lista prezensa mós susar. Ami ketik tiha iha laptop privadu xave iha USB depois lori ba emprime iha rental,” Xefe Departamentu Operasionál Jestaun Merkadu Taibesi, Gaspar da Silva, ba Agência Tatoli, iha Taibesi.
Nia hateten, hasai osan rasik ba halo impresaun iha rentál kona-ba relatóriu no lista prezensa ba funsionáriu sira.
Jestór Merkadu Manleuana, Júlio Barros F. Caldas, aprezenta falta kondisaun ka fasilidade servisu iha eskritóriu.
“Ami lahetan apoiu ruma, afinál ami presiza. kuandu ami hakarak halo karta ka relatóriu ruma, ami tenke ba sede suku. Kebetulan sira iha sede suku ami servisu hamutuk di’ak,” Jestor Merkadu Manleuana, Júlio Barros F. Caldas, hateten ba Tatoli iha Manleuana.
Tuir nia, servisu jestaun merkadu ba uza komputadór no mákina impresaun sede suku Manleuana nian atu emprime iha ne’eba.
Jestór ne’e hateten, tinan barak ona jestaun merkadu utiliza no hetan apoiu hosi sede suku Manleuana, tanba kondisaun servisu mak la permite hodi hala’o serbisu administrasaun iha eskritóriu.
“Ami hato’o ona proposta ba iha autoridade kompetente, maibé agora seidauk iha resposta. Tinan barak ona ami laiha komputadór,” nia dehan.
Nia dehan, Governu fó apoiu komputadór rua iha 2013 ne’ebé to’o agora aat hotu ona no lahetan apoiu foun.
Merkadu Taibesi presiza moru
Entretantu, merkadu Taibesi presiza iha moru atu servisu jestaun merkadu bele kontrola di’ak-liu vendedór no sasán negosiante sira iha kalan atu haruka ema fila ba uma.
“Merkadu Taibesi laiha kondisaun ita atu haruka ema fila, merkadu ida-ne’e livre, laiha moru no ita hare ema tama sai livre. Se ita haruka vendedór sira fila, sé mak kuidadu sira-nia sasán,” Xefe Departamentu Operasionál Jestaun Merkadu Taibesi, Gaspar da Silva, hateten ba Tatoli iha Taibesi.
Nia esplika, atu tuir regra merkadu nian no haruka vendedór sira fila ba uma, tenke iha moru haleu hanesan iha merkadu Manleuana.
“Presiza iha moru no portaun atu ema tama no sai dala ida hodi nune’e seguransa sira de’it mak hela. Ida-ne’e atu evita ema-nia sasán lakon iha merkadu,” Gaspar da Silva hateten.
Tuir nia, labele haruka ema fila ba uma, bainhira merkadu Taibesi laiha kondisaun atu asegura sasán negosiante sira.
Nia esplika, servisu jestaun merkadu hala’o kontrolu di’ak, kuandu iha kondisaun ida atu bele kontrola no asegura sasán vendedór sira.
Xefe departamentu ne’e hateten, negosiante hosi munisipiu 13 konsentra hotu iha merkadu no halo negósiu kuaze oras 24, tanba ne’e mak presiza iha moru.
Gaspar da Silva hateten, agora daudauk ne’e vendedór sira hamutuk uma kain 361 mak hela iha merkadu Taibesi.
Nia dehan, ema vendedór sira buka moris atu sustenta sira-nia moris maibé Governu hakarak muda sira tenke kria kondisaun ne’ebé adekuada.
Jornalista : Jesuina Xavier
Editór : Cancio Ximenes
