COVALIMA, 26 outubru 2023 (TATOLI) – Komisaun Nasionál ba Eleisaun (CNE, sigla portugés) munisípiu Covalima garante eleisaun suku ne’ebé realiza iha loron 28 sei la’o ho transparénsia.
Diretór CNE, Hermenegildo de Sena, afirma asuntu ne’e tanba fi’ar katak preparativu sira husi Sekretariadu Tékniku Administrasaun Eleitorál (STAE) hodi disponibiliza formasaun ba pesoál apoiu suku, pesoál apoiu aldeia, meza asembleia no CNE nia formasaun ba Ofisiál Supervizaun Eleisaun (OSE) kona-ba lala’ok eleisaun suku la’o ho di’ak.
Tanba ne’e, dirijente husu ba OSE sira iha terrenu atu labele abandona prosesu kontajen votu ba kandidatura xefe suku sira.
CNE Covalima rekruta ona ba ofisiál supervizaun suku hamutuk 148 ne’ebé sei destaka ba aldeia 148 iha postu administrativu hitu hanesan Fatululik, Fohorem, Fatumea, Tilomar, Maucatar, Suai no Zumalai.
Ba eleisaun ne’e, STAE Covalima rekruta mós pesoál apoiu suku no aldeia hamutuk 326.
Tuir dadus, STAE rejista totál kandidatura xefe suku iha munisípiu Covalima hamutuk 164 ne’ebé kompostu husi feto 16 no mane 148.
Notísia relevante: STAE Covalima aluga viatura hodi transporta materiál eleisaun bá postu administrativu
Jornalista: Celestina Teles
Editora: Maria Auxiliadora
