BAUCAU, 26 outubru 2023 (TATOLI) – Estabelesimentu ensinu privadu, Eskola bazika katólika Santa Ursula munisípiu Baucau realiza atividade kuda ai-oan iha Baucau Vila nu’udar atividade extra-kurrikulár.
Prezidenti Komisaun Organizadora, Sabino António Dias, esplika, objetivu realiza atividade refere tulun no hanorin estudante sira atu hadomi ambiente hanesan kuda hanoin di’ak iha estudante sira-nia pensamentu katak proteje ambiente.
“Ai-oan tipu jardin hamutuk tolu mak estudante sira kuda hanesan kulu-jaka, bua no rambutan,” Prezidenti Komisaun Organizadora hateten iha Vila nova, kinta ne’e.
Fundasaun Santa Ursula liuhosi Komisaun Organizadora deside atividade kuda ai-oan iha fatin hamutuk 18 hanesan edifísiu Autoridade Administrasaun Munisipál Baucau, Eskola Báziku Sentrál Vila nova, Komisaun Nasionál Eleisaun (CNE, sigla Portugés) no Ensinu sekundária publiku númeru I Vila nova.
“Ai-oan hirak ne’e apoia hosi fundasaun Santa Ursula,” Sabino Dias akresenta.
Atividade ho tema sanur camp “Ami prontu proteje ambiente” realiza durante loron-tolu hosi loron-25 to’o 27 fulan-outubru ne’ebé partisipa hosi estudante pre-eskolár to’o ensinu báziku hamutuk 625 ho tótal ai-oan kuda hamutuk 180.
Jornalista : Natalino Belo
Editór : Rafael Ximenes de A. Belo
