DILI, 26 outubru 2023 (TATOLI)– Igreja Katólika iha Timor-Leste husu ba juventude, ohin loron atu hametin pás no estabilidade hodi luta ba dezenvolvimentu nasionál.
Diretór Komisaun Justisa Pás Arkidioseze Metropolitana Díli, Padre Demétrio da Conceição, hateten pás mak bele hamosu estabilidade nasionál hodi kontribui ba dezenvolvimentu nasionál.
“Ema barak tau konsiderasaun katak úniku dalan tenke iha pás. Tanba pás mak garante ba dezenvolvimentu sustentável, nune’e husu ba joven-sira atu hametin unidade nasionál hodi kontribui ba pás no estabilidade atu kontribui ba dezenvolvimentu nasionál”, dehan Padre ne’e ba Agência TATOLI iha Lecidere-Dili.
Atu garante pás iha sosiedade, nia dehan Igreja Katólika sempre hala’o formasaun ba sarani sira liuliu joven-sira no família iha área dioseze Dili.
Tanba, nia afirma Timor-Leste hanesan nasaun ida ne’ebé sai hosi pos-konflitu, nune’e sempre mosu problema barak entre grupu sira, nune’e tenke hahú hametin konsénsia atu kontribui ba pás iha Timor-Leste.
“Ami nia formasaun hahú husi familia sira no grupu ki’ik oan sira iha dioseze atu nune’e bele eduka sira nia familia iha uma laran. Ida asaun sensibilizasaun familia ba dame”, Amo afirma.
Nia apela mós ba autoridade lokál, Igreja no sosiedade sivil hodi servisu maka’as hodi garante ba pás no estabilidade iha sosiedade atu ema hotu hala’o nia atividade ho livre no labele sente ta’uk.
Governu mós presiza kria kondisaun eskola sira hahú nivél primáriu to’o universidade iha Timor- Leste atu produs rekursu umanu ho kualidade atu kontribui ba prosesu dezenvolvimntu nasionál.
Notísia relevante: Komisaun Justisa Paz sei organiza marsa ba pás molok eleisaun parlamentár
Jornalista: Jesuína Xavier
Editor : Florencio Miranda Ximenes
