DILI, 26 outubru 2023 (TATOLI) – Komité Orientadór 25 (KO25) sei prodús livru kona-ba istória rezisténsia volume I to’o III iha tinan oin hafoin hetan apoiu orsamentu husi Ministériu Edukasaun (ME) ho montante rihun $250.
Prezidente Komité Orientadór 25, Constâncio Pinto, hatete serbisu KO25 nian maka halo investigasaun ne’ebé kle’an kona-ba envolvimentu joven sira-nian iha luta ba libertasaun nasionál no nia rezultadu ikus maka sei hakerek livru ida kona-ba istória hosi rezisténsia Timor-Leste nian.
“Ami hetan ona apoiu osan uitoan ho montante rihun $250 husi Ministériu Edukasaun, tanba ne’e ami sei prodús uluk ita-nian istória rezisténsia ne’ebé konsege hakerek hotu ona husi volume I to’o III. Depois osan iha fali maka ami sei kontinua prodús tan volume tuirmai tanba agora ami iha ona volume VI kona-ba istória rezisténsia ne’ebé ami rekolla”, Constâncio Pinto dehan ba Tatoli iha Vila Verde, ohin.
Nia salienta maske orsamentu ne’ebé ME tau ne’e la sufisiente, maibé KO25 tenta atu jere hodi bele finaliza tiha obra sira ne’ebé maka ekipa sira prodús ona no bele haree fali ba planu sira tuirmai.
Nia hatutan esforsu ne’ebé Komité halo ne’e kompleksu tebes no dalabarak atu buka komentáriu ba líder istóriku sira iha livru volume primeiru ne’e mós difísil tebes, maibé sira iha kompromisu atu halo nafatin esforsu tuir planu ne’ebé iha ona hodi bele prodús obra sira ne’e iha tinan oin.
Serbisu Komité Orientadór 25 ne’ebé harii iha 2017 loloos konklui ona nia misaun, maibé durante ne’e KO25 enfrenta problema barak inklui transferénsia orsamentu sira, tanba ne’e maka seidauk bele finaliza nia traballu. KO25 fiar katak ho planu produsaun livru rezisténsia ba dahuluk iha 2024 ne’e bele tulun liután serbisu Komité nian iha futuru.
Iha 2019, tuir Constâncio Pinto, KO25 hetan osan ne’ebé sufisiente hodi hala’o serbisu sira, liuliu halo peskiza kona-ba istória rezisténsia sira hodi halibur dadus sira mai to’o iha 1999. Husi orsamentu sira ne’e maka sira konsege prepara ona kondisaun sira atu konklui serbisu iha tinan oin.
Komité Orientadór 25 hanesan instituisaun ne’ebé kria liuhusi rezolusaun Governu no kompostu hosi organizasaun juventude rezisténsia hamutuk 25.
Notísia relevante: Komité Orientadór 25 husu MEJD hatama istória luta iha kurríkulu
Jornalista: Tomé Amado
Editora: Maria Auxiliadora
