DILI, 26 outubru 2023 (TATOLI) – Ministru Administrasaun Estatál (MAE) Tomás do Rosario Cabrál ho ekipa atualiza preparasaun ba komemorasaun loron nasionál 28 Novembru no tomada posse ba Xefe Suku foun ba Prezidente Repúblika, José Ramos Horta.
“Ami mai relata ba Prezidente Repúblika kona-ba preparasaun ba selebrasaun loron proklamasaun 28 de Novembru ne’ebé ita sei hala’o iha fulan oin no tomada posse ba Xefe Suku eleitu sira”, Ministru Tomás dehan ba jornalista sira iha Psalásiu Prezidensiál, ohin.
Selebrasaun 28 Novembru tinan ida-ne’e realiza iha territóriu nasionál hotu no fó kedan posse ba xefe suku eleitu sira iha ida-idak nia munisípiu no postu administrativu iha territóriu nasionál.
“Iha postu administrativu hotu sei hasa’e bandeira hotu hodi kontinua fó kedan posse ba xefe suku no xefe aldeia eleitu sira”, nia hateten.
Governu sentrál sei komemora loron nasionál ne’e iha Palásiu Prezidensiál Bairru Pite Dili.
Ba atividade ne’e, Governu sei gasta orsamentu hamutuk $467,582.00 ba territóriu nasionál hotu hodi komemora loron nasionál ne’e.
Jornalista: Hortencio Sanchez
Editór : Zezito Silva
