PR hato’o pedidu autorizasaun ba PN vizita Brunei Darussalam-Filipina-Vietname

DILI, 26 outubru 2023 (TATOLI)—Prezidente Repúblika (PR), José Ramos Horta, hato’o pedidu ba Parlamentu Nasionál (PN) hodi hetan autorizasaun ba dezlokasaun vizita Estadu ba nasaun Brunei Darussalam, Filipina ho Vietname.
Notísia Relevante: PN autoriza PR Horta hala’o vizita Estadu ba Roma-Dubai
Sekretária Meza Parlamentu Nasionál, Deputada Virgínia Ana Belo hateten, ohin iha reuniaun líder bankada deside tau ona ajenda plenária ba semana oin sei halo aprovasaun ba pedidu Xefe Estadu nian.
“Ohin, iha reuniaun líder bankada tau ona ajenda ba segunda-feira 30 outubru kona-ba asentimentu ba dezlokasaun Prezidente Repúblika nian ba rai-li’ur,” Sekretária Meza ne’e hateten ba jornalista sira hafoin ramata reuniaun líder bankada iha uma fukun PN, kinta ne’e.
Tuir pedidu hosi Xefe Estadu nian hala’o vizita Estadu ne’e dentru semana ida-nia laran hahú hosi 05-08 novembru 2023 iha Brunei Darussalam no loron 9-12 novembru 2023 iha Filipina.
Kona-ba vizita Estadu ba Vietname sei akontese iha loron 20-24 fulan-novembru 2023, nune’e PN sei aprova ka fó uluk asentimentu ba nasaun rua seluk no Vietname sei aprova iha tempu tuir mai.
“Ne’ebé konkorda ona tau ba ajenda iha reuniaun plenária 30 outubru atu aprova uluk viajen PR ba Brunei Darussalam ho Filipina no ba Vietname sei aprova iha 13 novembru, tanba tempu sei naruk hela,” nia dehan.
Sekretária Meza PN ne’e seidauk fó sai detallu kona-ba ajenda vizita Estadu Xefe Estadu nian tuir pedidu ne’ebé hato’o mai PN.
Enkuantu Parlamentu Nasionál tuir termu númeru 1 artigu 80 no alínea h) númeru 3 artigu 95 konstituisaun fó asentimentu deslokasaun Prezidente Repúblika.
Jornalista : Nelson de Sousa
Editór : Cancio Ximenes

