BOBONARO, 26 outubru 2023 (TATOLI)-Organizasaun arte-marsiál hosi Persaudaraan Setia Hati Terate (PSHT, sigla Indonézía) no Kmanek Oan Rai Klaran (KORK) munisípiu Bobonaro promete sei koopera ho autoridade seguransa hodi garante pás no estábilidade durante selebrasaun loron finadu (matebian).
Konselleru Másimu PSHT Bobonaro, Arlindo de Oliveira, hateten sei orienta ninia membru sira atu koopera ho arte-marsiál no rituál sira seluk no mós Instituisaun PNTL hodi asegura loron finadu ne’ebé sei selebra iha 02 fulan-novembru 2023.
Notísia Relevante:PNTL Bobonaro suspende provizóriu atividade arte-marsiál
“Ita la’ós ema fuik ho le’et ida ita mesak ema Timor-oan de’it ita mesak maun-alin ho bin-alin de’it organizasaun mak fahe malu maibé dalaruma relasaun família ne’e iha hela. Ita ida de’it entaun ita tenke kontribui ba eventu bo’ot sira mai liu-liu finadu nian ne’e, ha’u husu ba membru hotu-hotu hakmatek hodi fó susesu ba loron bo’ot matebian,” nia informa ba jornalista sira iha Maliana.
Nune’e mós Sekretáriu Jerál KORK munisípiu Bobonaro, Agustino dos Santos Mouzinho, hateten daudaun ne’e, orienta hela membru sira atu mantein situasaun ida hakmatek iha ida-idak ninia hela fatin.
“Ita hakarak finadu ne’e ema hotu la’o hosi fatin ida ba fatin seluk iha munisípiu Bobonaro la’o ho di’ak, hahú hosi sira mai hosi kapitál Dili ba sira-nia suku ho aldeia ho di’ak no ami garante sira fila ba fatin destinasaun mós ho di’ak,”Agustino garante.
Notísia Relevante:PNTL Bobonaro, BOP no F-FDTL sei asegura selebrasaun loron finadu
Jornalista: Sergio da Cruz
Editór: Agapito dos Santos
