APFTL sensibiliza informasaun kona-ba prosesu rekrutamentu membru foun ba estudante sira iha Covalima
COVALIMA, 27 outubru 2023 (TATOLI) – Ministériu Juventude Desportu, Arte no Kultura (MJDAK) no Alumi Parlamentu Foinsa’e Timor-Leste (APTL) sensibiliza informasaun kona-ba prosesu rekrutamentu membru foun ba estudante ensinu báziku no sekundáriu sira, iha munisípiu Covalima.
Sofia Maria Ximenes, xefe ekipa ba programa sensibilizasaun hateten atividade ne’e atu divulga informasaun kona-ba rekrutamentu no eleisaun ba membru Parlamentu Foinsa’e ba períodu 2024-2026.
Nia esplika katak atu halo rekrutamentu ba Alumi Parlamentu Foinsa’e sei distribui formuláriu ba kada postu administrativu, ba Sentru Juventude Covalima no ba eskola bázika no sekundária sira.
Bazeia ba rezolusaun Governu númeru 23/2009 , 18 novembru, ho alterasaun dahuluk relozusaun Governu númeru 47/2017 , 16 agustu, Parlamentu Foinsa’e nu’udar espasu ba joven sira ho idade entre 12 no 17 atu aprende ho prátika demokrasia, lideransa no formasaun sidadania hodi sai sidadaun síviku no responsavel.
Kritériu atu sai membru Parlamentu Foinsa’e mak sidadaun timoroan, kandidatu hela iha postu administrativu ka munísipiu refere (deklarasaun suku), idade kandidatu entre 12 no 17, joven eskola hela, ka para eskola, ka la eskola, seidauk forma família, laiha moras krónika (opsionál atestadu médiku), fotokópia sertidaun RDTL ka billete identidade (BI) husi kandidatura no fotokópia sertidaun RDTL ka BI ka kartaun eleitorál husi inan-aman kandidatu.
Funsaun husi Parlamentu Foinsa’e mak estimula joven sira hodi adota atitude responsavel ba sira-nian sosiedade relasiona ho sira-nian aktu, nune’e mós aktu husi ema/parte seluk, informa kona-ba direitu, devér, liberdade no garantia fundamentál hanesan sidadaun. Halo sira koñese organizasaun no podér polítiku, órgaun soberanu, nune’e mós ho kompeténsia no funsionamentu husi órgaun hirak ne’e.
Enkoraja joven sira-hodi ezerse sira-nian direitu ho forma demokrátika no partisipa iha vida públika, forma joven sira hodi sai líder responsavel. Kontribui formasaun ba joven sira, espesialmente iha mós área empreendedorizmu, dezenvolve sensibilidade sosiál, promove kapasidade oratóriu.
“Ho nune’e halo joven sira interese hodi partisipa iha identifikasaun no kompriensaun ba komunidade ninia problema no aprezenta ninia solusaun sira”, Sofia Ximenes esplika.
Iha sorin seluk, Diretór Sentru Juventude Covalima, Calistro Leite Gusmão, agradese ba Alumi Parlamentu Foinsa’e tanba realiza atividade hodi fahe informasaun kona-ba prosesu atu halo rekrutamentu ba membru foun.
Iha programa sensibilizasaun ne’e partisipa husi estudante Ensinu Baziku Sentrál Suai Loro, Eskola Sekundária Ave Maria Suai, Eskola Sekundária Jerál Públiku Suai no Eskola CAFE Covalima.
Jornalista: Celestina Teles
Editora: Maria Auxiliadora
