VIQUEQUE, 27 outubru 2023 (TATOLI)—Ekipa responsável kompostu hosi Autoridade Viqueque hamutuk ho Komisaun Nasionál Eleisaun (CNE, sigla portugés) no Sekretariadu Tékniku Administrasaun Eleitorál (STAE), sesta ne’e, hahú distribui materiál ba sentru votasaun iha suku no aldeia, ba realizasaun eleisaun komunitária iha sábadu (28/10) aban.
Administradór Viqueque, Januário Soares ‘Bolly’, hateten, aban eleitór sira bele ezerse sira-nia direitu votu hodi hili líder komunitáriu preferénsia hanesan xefe suku, xefe aldeia inklui delegadu/a sira.
“Ohin ita halo distribuisaun materiál sensitivu no naun sentivu bá fatin votasaun iha aldeia hamutuk 230 no suku 35, enkuantu suku Builo maka la partisipa eleisaun. Ita la uza urna transparánsia desde kedan ukun rasik-an, maibé agora ita foin uza ba eleisaun ne’e,” nia hato’o iha salaun administrasaun munisipál.
Nune’e, aban, hahú tuku 08:00 dadeer sei loke meza eleitóral aldeia hodi halo prosesu eleisaun kandidatu xefe aldeia, ofisiál supervizaun CNE inklui pesoál apoia suku no aldeia hosi STAE, nune’e bele ajuda eleisaun la’o ho susesu.
“Ha’u husu mós ba motorista sira ne’ebé tula materiál, tenke lori karreta ho kuidadu atu materiál sira bele to’o iha aldeia no aban ita bele vota,” nia tenik.
Notísia relevante : Viqueque aloka rihun $226-resin ba eleisaun suku
Iha fatin hanesan, Diretór STAE Viqueque, Humberto Fernandes, hateten, materiál sensitivu eleisaun komunitátria kompostu hosi buletin ba xefe suku, xefe aldeia no delegadu/a.
“Materiál sira-ne’e ami halo pakotementu durante loron-tolu, nune’e ohin ami halo distribuisaun ba fatin eleisaun sira. Tanba ne’e, ita nu’udar Viqueque-oan tenke hamutuk hodi distribui materiál sira bele to’o iha fatin votasaun,” nia hameno.
Tuir dadus, boletin votu ba xefe suku hamutuk livru 1.289 no folla hamutuk 64.450, ba xefe aldeia livru 2.076 no folla 103.800, ba delegadu-a livru 1.268 no folla 63.400. Distribuisaun buletin votu ba aldeia no suku hotu iha Viqueque ramata iha tuku 11:00 dadeer ne’e.
Atividade abertura distribuisaun materiál partisipa hosi Administrasór postu lima, Diretór Servisu Munisipál, Komandante Polísia Nasionál Timor-Leste (PNTL) Viqueque, inklui entidade relevante. Akompaña mós hosi Diretór CNE Viqueque, Ofisiál Supervizaun CNE, Pesoál apoia suku no aldeia hosi STAE inklui membru Polísia.
Jornalista : Vitorino Lopes da Costa
Editora : Julia Chatarina
