MANATUTO, 27 outubru 2023 (TATOLI)– Ajénsia Koperasaun Internasional Japaun (JICA) iha sesta semana ne’e ho prezensa Governu Timor-Leste reinagura hikas irigasaun Boluto iha munisípiu Manatuto ne’ebé antes ne’e hetan estraga iha Siklone Seroja 04 abril 2021.
Ministru Obras Públika, Samuel Marçal hato’o agradese ba Governu Japaun liu husi JICA nia apoiu no espera irigasaun ne’ebé rehabilita ona bele hasa’e produsaun rai laran la’os deit ba produtu hare maibé ba produtu seluk.
“Ida ne’e apoiu politika Governu nian hodi bele hamenus importasaun foos husi liur, ita hatene agora foos folin sa’e laos deit iha Timor maibé iha mos nasaun hotu,” Samuel Marçal dehan ba Jornalista sira iha Irigasaun Boluto, sesta ne’e.
Embaixador Japaun iha Timor-Leste, Tetsuya Kimura hateten iha tinan 2021, inundasaun histórika halakon vida husi ema barak nian, no estraga ona infraestruturas importante iha fatin barak iha nasaun ida ne’e.
“Responde ba pedidu urjente husi Governu Timor-Leste, espesialista sira husi Japaun, parseria ho sira-nia omologu iha Timor-Leste, identifika ona fatin haat no Governu Japaun realiza ona servisu reabilitasaun liuhusi JICA, unklui iha Boluto Manatuto,” nia hateten.
Tetsuya Kimura dehan Japaun mós kontenti atu partilla ninia experiênsia no teknolojia ho Timor-Leste, tanba Redusaun Risku Dezastres mak entre ida husi prioridades ba kooperasaun dezenvolvimentu Japaun nian.
Parte seluk, Prezidente JICA, Akihiko Tanaka esplika obra ba rehabilitasaun irigasaun Boluto hola parte mós iha JICA nia suporta seluk hanesan rehabilitasaun ba mota-ibun Comoro Dili, sistema abastesimentu bee moos, no sistema irigasaun Maliana ho montante orsamentu 1 Billion Yens – JPY (yen biliaun ida) ou miliaun $7,5.
“JICA kompromete ona atu kontinua suporta povu Timor-Leste liuhosi hasae kualidade infraestrutura báziku esensiál iha Timor laran tomak. Ami espera katak projetu ne’e sei fo impaktu positivu ba komunidade sira nia moris no kontribui ba dezenvolvimentu nasaun ida forti liu,” Akihiki Tanaka esplika.
Irigasaun Boluto ne’ebé lokaliza iha Postu Administrativu Laleia, Munisipíu Manatuto antes ne’e remata nia konstrusaun final iha tinan 2017 ho orsamentu total miliaun $14 ne’ebé hetan apoiu maximu husi Japaun. Konstrusaun refere fasilita irigasaun be’e ba rai hektare 780 iha Laleia Manatutuo inklui Vemasse, Baucau.
Atividade reinagurasaun ne’ebé realiza iha Irigasaun Boluto hetan partisipasaun masimu husi governu liu hosi Ministru Agrikultura, Perkas, Pekuaria no Floresta, Marcos da Cruz, autoridade lokal no komunidade agrikultor.
Jornalista : Cidalia Fátima
Editora : Armandina Moniz
