VIQUEQUE, 26 outubru 2023 (TATOLI)—Polísia Nasionál Timor-Leste (PNTL) daudaun ne’e, destaka ona membru hamutuk 202 hodi asegura eleisaun komunitária iha munisípiu Viqueque.
Membru PNTL ne’ebé koloka ba fatin eleisaun iha Viqueque hamutuk 136, hamutuk ho PNTL nasionál na’in-44, unidade espesiál na’in-12 no Batallaun Orden Públiku (BOP) na’in-10.
“Ami destaka ona membru ba fatin votasaun hodi bele asegura eleisaun komunitária, hanesan misaun seguransa nian ami sei kumpre dever garante estabilidade hodi eleitór ba ezerse votu ho di’ak no susesu,” Komandante PNTL munisípiu Viqueque, Superentendente, João da Costa, informa ba Agência Tatoli, hafoin ramata akompaña atividade distribuisaun materiál, iha administrasaun munisipál, sesta ne’e.
Nune’e, nia husu entidade tomak iha atu kolabora ho parte seguransa hodi kontribui ba pás no estabilidade iha eleisaun.
“Seguransa tenke ho pasiensia no disipliña hodi akompaña eleisaun la’o ho di’ak atu labele akontese buat ruma,” nia akresenta.
Notísia relevante : CNE sensibiliza lei eleisaun suku ba abitante Viqueque
Nune’e mós, nia husu ba membru sira ne’ebé koloka ona iha fatin votasaun, tenke ho responsablidade hodi asegura prosesu eleisaun ida-ne’e.
“PNTL bandu ema halo barullu iha fatin eleisaun no bandu ema labele konsumu alkool iha fatin votasaun sira hotu, bainhira mosu barullu ruma maka membru sira sei halo medida atuasaun,” nia alerta.
Jornalista : Vitorino Lopes da Costa
Editora : Julia Chatarina
