VIQUEQUE, 28 outubru 2023 (TATOLI)—Administradór postu Uatulari, munisípiu Viqueque, Manuel do Rosário, hateten, eleisaun órgaun suku la’o ho hakmatek no la rejista barullu ruma iha fatin votasaun 63.
“Ha’u nu’udar responsável ba eleisaun suku ba postu Uatulari, ohin ha’u halo observasaun ba sentru votasaun sira ne’ebé realiza iha kada aldeia iha postu Uatulari la’o hakmatek no laiha barullu ruma mosu iha fatin votasaun. Maski antes ne’e mosu barullu, maibé agora ha’u haree situasaun normál,” Manuel do Rosário, hateten ba Agência Tatoli, hafoin halo observasaun ba sentru votasaun iha aldeia Raila’a, suku Uaitame, sabádu ne’e.
Autoridade postu ne’e dehan, eleisaun ida-ne’e familiár nune’e eleitór sira nafatin kria pás no estabilidade hodi hein rona rezultadu.
“Ha’u husu ba joven sira, bainhira hakarak susesu iha futuru tenke prepara-an no partisipa iha eleisaun hodi envolve iha prosesu dezenvolvimentu hosi Governu tama mai iha postu Uatulari. Joven labele halo problema no tenke kontribui ba pás, estabilidade no trankilidade,” nia apela.
Notísia relevante : Viqueque aloka rihun $226-resin ba eleisaun suku
Iha fatin ketak, Xefe suku Uatulari, José do Rosário, relata, eleisaun ba períodu ida-ne’e ba suku Uaitame la’o ho susesu.
“Iha eleitór balun la tuir tanba balun ba tiha estranjeru no balun eskola iha Dili atu mai maibé transporte laiha. Tanba ne’e, eleitór balun la partisipa. Suku Uaitame iha kandidatu hamutuk na’in-neen. Tenke iha unidade tanba ida de’it mak sei manán no sei serví povu. Hanesan autoridade suku Uaitame, nafatin fó hanoin ba joven sira atu kria pás no estabilidade iha suku Uaitame,” nia tenik.
Tuir observasaun Agência Tatoli iha terrenu, nota katak eleisaun órgaun suku iha postu Uatulari, eleitór sira prepara festa familiár no tau hahán iha fatim votasaun hodi hein rona rezultadu.
Postu Uatulari kompostu hosi suku neen hanesan Afaloikai ho eleitór hamutuk 3.209, Babulu 1.612, Macadique 4.182, Matahoi 3.366, Uaitame 1.161 no Vesssoru 1.214.
Jornalista : Vitorino Lopes da Costa
Editora : Julia Chatarina
