Komunidade Tirilolo preokupa Eleisaun Suku atende ho sistema manuál

BAUCAU, 28 outubru 2023 (TATOLI) – Komunidade hosi suku Tirilolo, postu administrativu Baucau Vila, munísipiu Baucau, preokupa ho Eleisaun Suku la’o ho sistema manuál tanba bele mosu manipulasaun.

Razaun fundamentál ne’ebé komunidade sira nota iha Eleisaun Suku ne’e mak laiha tinta, entaun eleitór ida bele vota dupla, kandidadura xefe aldeia, delegadu no delegada laiha fotografia, fatin votasaun mós ladún dignu no laiha baze dadus hodi justifika eleitór ida vota ona, tanba hakerek ho manuál.

Xefe suku atuál Tirilolo, Ricardo Ernesto Belo, esplika, eleisaun lideransa komunitária tinan-ne’e konsideradu falla tanba lista naran votante hakerek de’it, sentru votasaun ida iha de’it estasaun votu ida-ne’ebé la kondiz ho entuziasmu votante ne’ebé barak.

“Falla totál tanba atendementu ladi’ak, eleisaun komunitária ne’e importante tanba sei halo atendimentu direita ba komunidade sira iha baze,” Xefe suku Tirilolo informa ba Agência TATOLI liuhosi telefonika, sábadu ne’e.

Tuir nia, rekrutamentu ba Pesoál STAE Apoia suku ho aldeia tenke bazea ba númeru vontante iha kada suku nune’e bele aselera vota maibe tinan-ne’e kada sentru votasaun PSAS no PSAA iha de’it nain-tolu halo votante barak forma hosi dader to’o oras determina komunidade barak la vota.

Nune’e mós eleisaun tinan-ne’e laiha tinta nune’e posibilidade bele mosu dupla votu ho ema hanesan mesmu iha posibilidade kiik maibé sistema refere loke oportunidade mosu krime eleitorál.

“Tuir loloos eleisaun suku prioridade tanba lideransa komunitária sei hili xefe suku ne’ebé futuru sei atensaun direita ba komunidade iha baze,” Ricardo Belo akresenta.

Tuir observasaun Agência TATOLI iha sentru votasaun Eskola Bázika Sentrál Lutumutu mosu protesta hosi vontante sira tanba meza asembleia deside hapara votante labele ona ezerse direitu tanba oras hatudu 15:00.

Suku Tirilolo hamutuk sentru votasaun neen kompostu Betulale, Lutumutu, Caisido, Lialailesu, Parlamentu no Osso-ua ho totál vontante hamutuk 6.877.

Entretantu kandidatura iha suku Tirilolo hamutuk nain-haat hanesan xefi suku sesante Ricardo Ernesto Belo, atuál xefe aldeia Betulale Elvino Freitas Belo, Martinho da Costa Belo no Aldermiro da Silva Belo.

Eleitór sira kestiona

Eleitór sira iha munisípiu Baucau kestiona sistema eleisaun suku tinan-ne’e tanba buletin votu komplikadu inklui laiha lista votante.

Gaspar da Costa nu’udar votante hosi aldeia Lutumutu, suku Tirilolo, postu admistrativu Baucau Vila, hateten, prosesu eleisaun refere komplikadu tanba buletin votu hamutuk tolu hanesan Xefe suku, aldeia no delegadu inklui delegada.

Nia argumenta, buletin votu ne’ebé prepara ba delegadu no delegada laiha fotografia nune’e hamosu komplikasaun ba eleitór sira atu deside votu ba kandidatura refere.

“Delegadu ho delegada na’in-neen kedas, ha’u atu vota maibé la komprende no haree la moos entaun ha’u husu ba prezidente meza atu esplika ba ha’u,” Gaspar da Costa hateten iha Vila nova, sábadu ne’e.

Nia hatutan, situasaun refere posibilidade vontante barak sei la ezerse direitu tanba kandidatu hamutuk na’in-neen komposta hosi feto tolu no mane tolu laiha fotografia nune’e halo eleitór dúvida hodi deside votu.

“Ha’u-nia matan malahuk ona, haree delegadu ho delegada iha na’in-neen kedas, depois foto la taka iha buletin votu halo ha’u tenke tama sai hodi husu esplikasaun ba presidente meza,” Gaspar da Silva akresenta.

Kandidatura xefe suku Bahú, postu Baucau Vila, Eleuterio Boavida, hateten, prosesu eleisaun suku tinan-ne’e lista eleitór hakerek de’it nune’e difikulta hodi hatarde votasaun inklui posibilidade hamosu dupla eleitór tanba STAE la prepara tinta hafoin votasaun remata.

“Eleitorál hakerek deit ida-ne’e fo konsenkuénsia boot ba eleitór sira tanba tarde,” Eleuterio Boavida akresenta.

Eis xefe suku Bahú ne’e argumenta, eleisaun suku períodu liuba utiliza lista vontante nune’e ekipa tékniku STAE verifika no vistu de’it nune’e seidauk to’o oras determina votasaun remata ona.

Tuir observasaun Agênsia TATOLI iha terenu nota katak, sentru votasaun iha suku Tirilolo no Bahú postu Baucau vila to’o oras 03:00 larokraik maibe eleitór sei kontinua iha liña hodi forma tanba prosesu elisaun seidauk remata.

Jornalista   : Natalino Belo 

Editór         : Evaristo Soares Martins