OÉ-CUSSE 28 utubru 2023 (TATOLI – sentru votasaun sira iha suku Usitasa’e, sub-rejiaun Oésilo, Rejiaun Administrativa Espesiál Espesiál Oé-Cusse Ambeno (RAEOA) hahú kontajen votasaun iha tuku 20;00 ne’e hafoin eleitór sira remata ezerse direitu votu.
Agência Tatoli observa, sentru votasaun sira iha suku Usitasa’e fahe ba fatin tolu kolokadu iha aldeia tolu, Sifin, Pune no Buqui, no eleisaun hahú loke iha tuku 09:00 dadeersan, tanba iha tuku 07:00 to’o 09:00 kandidatu xefe aldeia sira no delegadu-delegada sei submete dokumentu iha meza asembleia suku ka sentru votasaun.
António do Santos Quefi nu’udar Pesoál STAE Apoiu Suku (PSAS) iha sentru votasaun Pune, informa, sentru votasaun loke iha tuku 09:00 no loloos taka iha tuku 15:00 lorokraik maibé tanba prosesu hotu ho sistema manuál.
Nune’e ekipa destakdu komposta hosi Pesoál STAE Apoia Aldeia (PSAA) hamutuk ho Polísia Nasionál Timor-Leste (PNTL) no koordena ho autoridadae lokál sira deside aumenta tempu tanba eleitór sira sei kontinua forma iha liña.
“Ita-nia atendimentu ohin kleur tanba sei identifika no hakerek ho liman, ida-ne’e mak kleur, depois fatin votasaun mós ida de’it ne’ebé kleur, entaun remata iha tuku 18:00 ne’e, depois ekipa deskansa uitoan, kontinua hadi’a hotu buletin votu maka ita kontinua kontajen,” Antonio do Santos Quefi informa.
Liga atendimentu ne’e, eleitór José Mala, prekupa no husu Governu presiza konsidera nune’e iha futuru bele hadi’a liuliu kona-bá nia baze legál sira ba lei suku nian.
“Lei númeru 9/2016 fó konfuzaun boot ba eleitór sira, tanba kandidatu suku iha foto maibé xefe aldeia ho delegadu sira laiha foto, serake inan-aman maioria la hatene lee no hakerek, ho situasaun ne’e difikulta tebes atu hili sira-nia kandidatu favóritu ne’ebé maka hakarak hili, kestaun seluk kandidatu sira hakerek ho liman lori tempu naruk, maioria vota de’it xefe suku, ba aldeia no delegadu sira loloos votu rua maibé vota ide de’it,” nia katak..
Nune’e, nia espera Governu liuhosi Ministériu Administrasaun Estatál (MAE) presiza atensaun no konsidera, tanba ne’e eleisaun ba lideransa komunitáriu, maibé ba eleisaun parlamentár no eleisaun prezidensisál atendimentu ho sistema modernu.
“Eleisaun foin daudaun tuku 15:00 remata ona, agora kleur halo ema hotu preokupa tanba atendimentu manuál, ida-ne’e signifika lei númeru 9/2016 diskrimina autoridade lokál sira tanba tratamentu la balansu kompara ho eleisaun PN no PR,” nia sujere.
Purtantu, kandidatura iha iha suku Usitasa’e hamutuk na’in-neen maioria mane hotu, hanesan, Agustinho da Caunan, Blasco Ulan, Liberatu Punef, Ricardo Sufa, Tomás Colo no Venancio Caunan.
Entretantu, totál eleitór iha suku Usitasa’e hamutuk 2.890, mane 1.470 no feto 1.420 mai hosi aldeia tolu hanesan, aldeia Sifin 809, mane 420 no feto 389, aldeia Pune hamutuk 1.011 mane 497 no feto 514, aldeia Buqui hamutuk 1.070 mane 553 no feto 517.
Jornalista: Abílio Elo Nini
Editór: Evaristo Soares Martins
