STAE Baucau implementa Eleisaun Órgaun Suku tuir lei
BAUCAU, 29 outubru 2023 (TATOLI) – Sekretariadu Tékniku Administrasaun Eleitorál (STAE) munisípiu Baucau implementa no realiza eleisaun komunitária bazea de’it ba matadalan no lei-númeru 9/2016 kona-bá lideransa komunitária.
Diretór STAE munisípiu Baucau, Natividade Freitas, esplika, prosesu eleisaun hotu komunidade barak sempre fó sala STAE katak la profisionál maibé lala’ok eleisaun suku hala’o tuir lei no matadalan ne’ebé prevee iha lei númeru 9/2016 kona xefe suku.
“Lei mak haruka hakerek, entaun ita bele uza lista no la tuir matadalan ne’ebé iha,” Diretór STAE Munisípiu Baucau hateten iha Vila Nova, domingu ne’e.
Natividade Freitas, argumenta, bainhira hakarak muda presiza ema hotu hamutuk atu hato’o ba governu atuál atu revizaun ba lei refere nune’e kondiz ho situasaun.
Komunidade ne’ebé kestiona sistema manúal tanba vontante barak iha suku nune’e hamosu pertubasaun inklui hakerek naran eleitór, boletin votu ba Xefe aldeia no delegadu inklui delegada.
“Ita hotu-nia esperansa se bele iha mudansa ba lei eleisaun komunitária tanba difikuldade ba eleitór ne’ebé barak,” Natividade Freitas akresenta.
Xefi suku Bahú, postu administrativu Baucau Vila, Manuel Gusmão, hateten, eleisaun períodu tinan-ne’e hala’o diak maibe hamosu pertubasaun tanba sistema manuál ne’ebé uza impaktu ba lala’ok eleisaun ne’ebé lenta.
“Eleitór barak mak mai tenke forma iha liña to’o kalan mak vota no komunidade barak tenke fila tanba maioria idozu,” Manuel Gusmão akresenta.
Manuel Gusmão, argumenta, maneira hakerek naran eleitór, boletin votu xefi aldeia , delegadu ho delegada, establese de’it sentru votasaun ida iha kada aldeia no la taka fotografia iha buletin votu xefi aldeia no delegadu inklui delegada halo lento prosesu hotu iha eleisaun komunitária.
Atuál xefe suku Bahú ne’e argumenta, taxa partisipasaun komunidade sa’e tanba entuziasmu maibé sistema mak prezudika, nune’e husu ba governu atu muda sistema manuál ba eletrónika nune’e aselera prosesu eleisaun komunitária iha ronde daruak iha loron-13 novembru.
Jornalista : Natalino Belo
Editór : Evaristo Soares Martins
