DILI, 30 outubru 2023 (TATOLI) – Autoridade Inspesaun no Fiskalizasaun Atividade Ekonómia, Sanitária no Alimentar (AIFAESA), hahú rekolla ona amostra ba foos Amor de família bá teste nia-kualidade iha laboratóiu Badan Pengawas Obat dan Makanan (BPOM) Kupang-Indonézia.
“Ami rekolla ona amostra, agora sei tama hela ba feriadu, entaun semana oin, ami sei haruka ba BPOM Indonézia atu halo teste hodi haree risku ba saúde ema nian ka kualidade ba konsumu”, informa Inspetór-Jerál AIFAESA, I.P, Ernesto Monteiro ba Agência TATOLI iha kna’ar fatin-Matadoru-Dili.
AIFAESA foti amostra ba foos Amor de Familia ho baze ba preokupasaun konsumidór sira nian iha rede sosiál hanesan Facebook, ne’ebé hateten foos susídiu hosi empreza Perissos ho kór kinur, nune’e presiza halo konfirmasaun ba nia kualidade konsumu.
Ministru Komérsiu Asuntu Ekonómiku mós orienta AIFAESA hodi rekolla amostra foos ho marka “Amor de Familia” atu teste nia kualidade.
“Daudaun ne’e sei la hapara ba ema hodi konsumu, tanba foos ne’e sirkula nanis ona iha merkadu, antes tau iha subsídiu Governu nian ba empreza importadora sira faan,” katak nian.
Kona-ba kór foos, nia dehan laiha problema tanba bainhira foos habai ho ahi suar nia kór muda ba kinur hanesan kazu ne’ebé akontese ba foos ho marka Manu Vitoria iha fulan hirak liuba no habai ho loron ne’e kór mutin.
Alende ne’e, nia dehan ekipa Sentru Logistika Nasionál no AIFAESA halo ona akompañamentu ba loja importadora sira faan ho presu asesivel $10 kada saka 20kg “Amor de Familia”, maibe tenke konfirma mós risku ba saude ema nian.
Entretantu, Empreza importadór Perissos Victoria,Lda, fa’an ona foos subsídiu governu ho marka “Amor da Familia” saka kilograma 20 ho folin $10 no saka kilograma 25 ho presu $12,50.
“Perissos Victoria,Lda nu’udar parseiru governu nia sempre pronto sai fasilitatór no hakarak implementa programa foos subsídiu Governu. Nune’e Konsumidór sira agora bele sosa foos ho marka amor de familia saka 20kg folin $10 no saka 25kg ho presu $11,50 iha loja ne’ebé besik ita boot sira”, refere nota ne’ebé Agência TATOLI asesu iha portál empreza Perissos, tersa ne’e.
Empreza ne’e fa’an baze akordu ne’ebé selebra ho Governu hodi implementa intervensaun temporária ba estabilizasaun folin foos iha merkadu.
Governu halo akordu ne’e ho objetivu mak atu asegura presu foos importadu, ne’ebé fa’an iha armazein empreza nasionál nian sira ne’ebé fa’an kuantidade boot, hodi fiksa ho montante másimu $12 ba kada saku ka parsela 25Kg, atu permite fa’an-rahun foos ho folin másimu 0,50 kada kilograma.
Hodi kumpre limite presu másimu ida-ne’e, empreza nasionál sira ne’ebé fa’an foos ho kuantidade boot ka operadór ekonómiku nasionál sira ne’ebé importa foos ho kuantidade boot sei simu subsídiu ho valór dolar amerikanu US$ 5 kada saku ka parsela 25 Kg, ne’ebé korresponde ho sentavu 20 ba kada kilograma foos nian.
Atu hetan subsídiu, empreza tenke submete pedidu pagamentu, akompaña ho kópia ne’ebé hetan autentikasaun hosi Autoridade Aduaneira, ne’ebé komprova katak importasaun produtu tuir espesifikasaun no períodu ne’ebé define ona iha Dekretu-Lei n. 76/2023, loron 29 fulan-setembru, ne’ebé estabelese medida ida-ne’e.
Empreza lima ne’ebé ohin formaliza ona akordu ho Governu maka, Perissos Victoria Lda., Loja Creative Furak Lda., Lisun Importação no Exportação Lda., Jusibel Unipessoal Lda no Alfa Dili Unipessoal Lda.
Notísia relevante: FRETILIN preokupa distribuisaun foos hosi empreza importadór laiha kualidade
Jornalista: Jesuína Xavier
Editór : Florencio Miranda Ximenes
