DILI, 30 outubru 2023 (TATOLI) – Ministra Edukasaun, Dulce de Jesus, no Embaixadora Kuba iha Timor-Leste, Grisel Alina Aldama Inniss, diskute prioridade tolu kona-ba implementasaun programa alfabetizasaun, atividade jinastíka iha eskola no formasaun lian española ba estudante sira.
Ministra Dulce dehan planu sira ne’e hatuur ona iha programa Ministériu Edukasaun (ME) nian iha Governu anteriór, maibé la konsege implementa tanba ne’e atuál Ezekutivu ho Embaixada Kuba diskute fali, nune’e bele realiza iha tinan oin.
“Ami hakarak reativa planu no programa sira ne’ebé trasa ona hanesan programa alfabetizasaun. Tanba ne’e importante tebes atu apoia maluk sira ne’ebé maka to’o agora seidauk hetan formasaun iha nivel ensinu sekundáriu. Tanba daudaun formasaun ekivalénsia ne’ebé maka ministériu kria foin maka to’o de’it nivel ensinu báziku”, Dulce de Jesus dehan iha Vila Verde, ohin.
Liuhusi oportunidade ida ne’e ME garante katak Kuba bele apoia programa ekivalénsia nivel sekundáriu, nune’e tulun timoroan sira, liuliu estudante sira ne’ebé maka mai ho nesesidade espesiál bele hetan sira-nian direitu iha nivel sekundáriu atubele tama ba universidade.
Governante ne’e relembra katak esperiénsia mós hatudu ona iha kooperasaun ho Governu Kuba realiza ona formasaun ba profesór timoroan sira atu apoia atividade jinástika iha eskola sira.
“Maibé, programa ne’e paradu tiha tanba laiha kontinuasaun, tanba ne’e liuhusi mandatu nonu Governu nian diskute fali hodi tau prioridade atu kontinua programa ne’e iha futuru. Ami hakarak hamoris fali atividade jinástika iha eskola sira iha territóriu atubele sai programa extra ida iha kada eskola”, katak.
Aleinde ne’e, iha planu seluk ne’ebé presiza atu implementa mak Governu Kuba hakarak disponibilzia formasaun língua española ba estudante sira molok sira hili dalan ba kontinua estudu iha Universidade Nasionál Timor Lorosa’e hodi foti medisina, nune’e sira iha ona koñesimentu ba dalen refere.
“Programa ida ne’e di’ak no ita sei ko’alia ho dirijente sira iha Universidade Nasionál Timor Lorosa’e”, realsa.
Embaixadora Kuba, Grisel Alina Aldama Inniss, hatete Kuba iha esperiénsia ba formasaun nomós programa sira ne’ebé permite ba estudante sira atubele aumenta sira-nian koñesimentu iha kontestu nasaun nian, kontestu família no ida ne’ebé importante liu mak oinsá Governu rua bele hametin kooperasaun iha setór edukasaun
“Ministra Edukasaun halo ona esplikasaun detalla kona-ba área oioin ne’ebé mak ami bele fó apoia direta bazeia ba karta pedidu ne’ebé haruka ona ba ami-nian Governu nomós kompromisu husi ami-nian Ezekutivu, liuhusi Ministr Edukasaun Kuba [Ena Elsa Velázquez]”, afirma.
Dirijente na’in-rua iha kompromisu boot atu halo esforsu oioin durante iha sira-nian mandatu hodi kontribui ba dezenvolvimentu setór edukativu iha Timor-Leste nomós ba joven sira, liuliu programa sira ne’ebé nasaun presiza.
Notísia relevante: Kuba kompromete apoia TL iha área edukasaun no desportu
Jornalista: Tomé Amado
Editora: Maria Auxiliadora
