VIQUEQUE, 30 outubru 2023 (TATOLI)—Kandidatu xefe suku 22 iha munisípiu Viqueque kompete iha eleisaun órgaun suku segunda volta ba períodu 2023-2030, hafoin liu eleisaun primeira volta iha loron 28 outubru 2023.
“Eleisaun suku ne’ebé realiza iha munisípiu Viqueque la’o di’ak. Rezulta eleisaun ba kandidatura xefe suku hamutuk suku 22 maka tenke ba eleisaun segundu volta tanba la atinje 51%, nune’e tenke ba eleisaun daruak no suku 13 maka liu bareira,” Prezidente Komisaun ba eleisaun órgaun suku no atuál Diretór Servisu Sivil munisípiu Viqueque, Cosme Sarmento, informa ba Agência Tatoli, iha resintu munisípiu Viqueque, segunda ne’e.
Sekretáriadu Tékniku Administrasaun Eleitorál (STAE) Viqueque rejista kandidatura xefe suku hamutuk 156, kompostu hosi feto 21 no mane 135 hosi postu administrativu lima.
Suku ne’ebé sei realiza eleisaun órgaun suku ba segunda volta mak hanesan postu Viqueque Vila iha suku neen, Lacluta suku rua, Ossu suku lima, Uatucarbau suku haat no Uatulari suku lima.
“Eleisaun órgaun suku ba tinan ida-ne’e ami observa iha difikuldade tanba ita-nia eleitór sira kuaze iha fatin votasaun 230 kestiona tanba buletin votu ba kandidatu xefe aldeia no delegadu/a laiha naran, hakerek de’it númeru. Entaun ida-ne’e sai preokupasaun ba inan aman sira ne’ebé la hatene lee nune’e mosu votu nulu barak,” nia haktuir.
Notísia relevante : CNE sensibiliza lei eleisaun suku ba abitante Viqueque
Nia iha esperansa katak ba futuru bele hadi’a atu nune’e labele difikulta eleitór sira bainhira ezerse direitu votu.
Iha sorin seluk, postu sira seidauk entrega akta hosi sentru votasaun ba munisípiu.
“Ami daudaun seidauk simu akta hosi kada postu, nune’e seidauk rejista votu nulu. Bainhira ami simu hotu maka ami bele fó sai ba públiku. Dadus sira-ne’e hosi postu aprezenta hotu mai munisípiu no ami sei aprezenta ba nasionál hafoin ami halo filafali preparasaun ba eleisaun segunda volta,” nia akresenta.
Iha fatin ketak, Diretór STAE, Humberto Fernandes, relata, eleitór maioria partisipa iha eleisaun órgaun suku.
“Ami bazeia lei númeru 09/2016 suku nian, ne’ebé ami implementa tuir lei, tanba ne’e buletin votu hakerek de’it naran la uza fotografia ba kandatura xefe aldeia no delegadu/a. Taka kandidatura nia fotografia iha kabina votu maka eleitór sira ba haree no ita la uza billete identidade no pasaporte, maibé uza kartaun eleitorál,” nia hato’o.
Nia dehan, pesoál apoia suku halo edukasaun votante molok loron 06 to’o 20, maibé eleitór sira barak maka la partisipa.
“Ami halo edukasaun votante ba eleitór sira oinsá vota ho loloos, maibé eleitór barak maka lakohi partisipa. Ho nune’e, iha eleisaun vota sala,” nia tenik.
Jornalista : Vitorino Lopes da Costa
Editora : Julia Chatarina
