Kandidatu xefe suku 6 iha Covalima eleitu iha primeira volta
COVALIMA, 30 Outubru 2023 (TATOLI)—Diretór Sekretáriu Tékniku Administrasaun Eleitorál (STAE) Covalima, Francisco Gusmão, hateten eleisaun líder komunitáriu ne’ebé realiza iha 28 outubru ne’e, nia rezultadu hatudu katak kandidatu xefe suku na’in-neen (6) eleitu ona sai xefre suku iha eleisaun primeira volta.
Notísia Relevante: Kandidatu xefe suku 251 sei avansa ba eleisaun segunda ronda
Eleisaun líder komunitária munisípiu Covalima hala’o iha postu administrativu Fatululik, Fatumea, Fohorem, Tilomar, Maucatar, Suai no Zumalai iha suku 30.
“Ha’u hato’o agradesimentu ba xefe suku nain-6 husi postu Administrativu Fohorem, Suai no Zumalai ne’ebé eleitu kedas iha eleisaun suku primeira volta,” Diretór STAE Covalima, Francisco Gusmão , hateten bainhira hala’o avaliasaun servisu PSAS-PSAA iha nia servisu fatin Kampung Baru, segunda-ne’e.
Iha avaliasaun ne’e, nia husu ba PSAS-PSAA iha nia suku ne’ebé kontinua hala’o eleisaun segunda ronda iha, atu kontinua aprende nafatin saida mak hasoru iha eleisaun primeira ronda, nune’e eleisaun segunda volta ne’e atu labele akontese tan erru ruma.
Iha postu administrativu Fohorem, kandidatu xefe suku ne’ebé eleitu iha eleisaun primeira volta ne’e mak hanesan iha suku Laktos ho suku Dato-Tolu, postu Suai iha suku Debos no postu Zumalai iha suku Mape Zulo no Usecai, no kandidatura iha suku 24 eleisaun tama iha faze segunda ronda.
Tuir planu. Eleisaun segunda volta sei hala’o iha loron 23 novembru 2023, ne’ebé hala’o i9ha territóriu laran tomak.
Jornalista : Celestina Teles
Editór : Cancio Ximenes
