DILI, 30 outubru 2023 (TATOLI) – Ministériu Edukasaun verifika ona dadus profesór kontratadu 4.019 no sei hetan ingresu espesiál iha faze dahuluk tuir Dekretu-lei n.u 31/2023, 31 maiu, kona-ba Rejime Karreira Dosente.
“Ami verifika ona dadus balun iha faze dahuluk, liuliu kona-ba profesór sira ne’ebé maka atu tama ba rejime karreira espesiál ligadu ho ingresu espesiál ba iha profesór kontratadu ne’ebé maka tama iha kritériu mínimu baxarelatu inklui avaliasaun dezempeñu sira durante tinan rua entre 2021 no 2022”, Diretora Nasionál Rekursu Umanu Ministériu Edukasaun, Anita de Jesus, hatete iha Vila Verde, ohin.
Nia esplika katak dekretu-lei ne’e daudaun nia programa balun maka iha ona preparasaun atu implementa no balun realiza ona, maibé tanba relasiona ho dadus entaun presiza halo verifikasaun ida di’ak atubele minimiza erru sira.
Ba dadus manorin sira ne’ebé parte rekursu umanu verifika ne’e sei submete ba superiór sira, nune’e Mistériu Edukasaun no Komisaun Funsaun Publika (KFP) bele haree hodi foti desizaun ba publikasaun dadus profesór kontratadu sira ne’ebé maka elejível ona hodi bele tama iha ingresu espesiál.
Dadus dosente kontratadu ne’ebé maka rekursu umanu ministériu rekolla ne’e hamutuk 5.009, maibé iha ona profesór hamutuk 4.019 maka elejível atu hetan ingresu espesiál tanba sira aprezenta ona dadus sira bazeia ba kritériu ne’ebé maka Ministériu Edukasaun no KFP presiza.
“Agora, hela de’it 990 maka seidauk submete dokumentu. Ami hein nafatin dadus ne’ebé seidauk kompleta tanba parte rekursu umanu ministériu nian halo nafatin komunikasaun ba iha servisu edukasaun munisipál sira atu [manorin] sira kompleta dokumentu ba sira-nian grau akadémiku hanesan baxarelatu no lisensiatura”, afirma.
Ba profesór sira ne’ebé maka sei tama iha ingresu espesiál, tuir dirijente, sira-nian saláriu sei iha mudansa ho profesór sira iha rejime jerál, tanba sira tama iha ingresu espesiál ba rejime karreira dosente.
“Profesór sira uluk mai ho rejime kontratu jerál ho grau D ka E agora sira tama ona ba grau C. Depois maka haree fali ba sira-nian diploma. Se profesór ida maka ninia diploma ne’e baxarelatu, nia sei hetan saláriu mensál entre $278, ba profesór ne’ebé mai ho grau lisensiatura sei hetan saláriu mensál husi $289”, adianta.
Husi dekretu-lei ne’ebé iha, ba manorin permanente sira sei iha mós promosaun tanba sira barak maka tama ona iha eskalaun ikus no agora iha ona mudansa ba rejime.
Tuir Anita, ho alterasaun lei ne’e, laiha ona asistente profesór no profesór sénior, maibé iha de’it profesór grau C, B no A. Atu hetan grau A mós la’ós automátiku maibé prosesu promosaun ne’e sei kategoria de’it ba profesór sira ne’ebé maka mai ho grau mestradu no doutoramentu, nune’e sira bele kompete hodi hadi’a kualidade edukasaun iha Timor-Leste.
Jornalista: Tomé Amado
Editora: Maria Auxiliadora
