BOBONARO,28 outubru 2023 (TATOLI)-Diretór Komisaun Nasionál Eleisaun (CNE,sigla portugués) munisípiu Bobonaro, Juvito Ramos, promete sei desloka bá iha aldeia Builecun, suku Balibo, postu administrativu Balibo, Bobonaro hodi halo investigasaun ba kazu kona-ba meja rejeita kandidatu xefe aldeia Lucas dos Santos ho ninia delegadu sira bainhira aprezenta sira ninia kandidatura hodi avansa ho kandidatu úniku xefe aldeia atuál Nuno Amaral Maia.
“Orsida meudia ami bá aldeia Builecun para buka hatene tanba saida meza rezeita kandidatu ne’e,”Nia hateten ba TATOLI, iha knaar fatin Maliana, segunda ne’e.
Nia hateten depois prosesu investigasaun remata mak CNE sei fó komentáriu kle’an kona-ba kazu ne’e ba publiku.
Iha parte seluk, antes ne’e, iha loron 28 fulan-outubru 2023, kandidatu xefe aldeia Lucas dos Santos relata bainhira STAE loke sentru votasaun iha tuku 07:00 dadeer OTL, kandidatu sira aprezenta kedas sira-nia kandidatu ba meza no meza simu ona sira ninia kandidatu, maibe to’o tuku 09:00 atu ba vota mak meza rejeita tanba nota membru na’in ida hosi kandidatu ne’e ninia kartaun hosi bairu seluk.
“Ami tama iha tuku 08:09 sira hakerek nonok de’it la hare dehan kartaun eleitorál ne’e aldeia Belola nian, ne’e tiha sira haruka asina tiha dehan hotu ona ami sai hein-hein sira la fó informasaun dehan apoiantes ida ne’e la tama to’o atu tama eleisaun mak sira fó sai dehan kandidatura xefe aldeia foun la jadi tanba nia apoiantes ida naran hosi aldeia Belola, ” nia hato’o lamentasaun ne’e ba TATOLI, via telefónika, sabadu semana kotuk.
Tuir loloos ekipa Pesoál STAE Apoia suku (PSAS) tenki konfirma ho kandidatu antes para troka apoiantes ka oinsá nune’e bele iha klareza maibé (PSAS) deside hodi avansa ho kandidatu úniku, ho aktu ne’e Lucas konsidera mosu manipulasaun durante prosesu ne’e la’o.
“Ami lamenta tanba oras atu to’o eleisaun ona dehan ha’u nia la jadi nusa ami ba rejistu naran ne’e lakohi ko’alia kedas para ami ba troka ha’u nia apoiantes ne’e ema Builecun, maibé ha’u lahatene ninia kartaun ne’e Belola se sira meza fó tempu 15 menit atu troka karik ha’u nia ema barak hela, maibé sira la fó hatene to’o eleisaun mak sira fó hatene,”nia klarifika
Tánba ne’e Nia husu ba Orgaun Eleitorál STAE no Komisaun Nasionál Eleisoens (CNE sigla Portugués) atu halo investigasaun ba kazu refere tanba deskonfia prosesu eleisaun xefe aldeia iha aldeia ne’eba deskonfia mosu manipulasaun.
“Antes eleisaun ema deskoinesidu hatuun hotu ona espanduk kandidatu xefe suku foun nian no tanba ita-nia estrutura ne’e foun hotu ohin loron akontese tan mai ha’u nia, sira hein iha ne’ebá ema ne’e lahatene manipula iha laran mós ita lahatene tanba sira ne’ebé servisu iha meza ne’e maioria KHUNTO,”Nia dehan
Jornalista: Sergio da Cruz
Editór: Evaristo Martins
