INCSIDA introdús konsensu fatin ba prostituisaun
DILI, 31 Outubru 2023 (TATOLI) – Prezidente Institutu Nasionál HIV/SIDA (INCSIDA,I.P), Daniel Marçal, informa INCSIDA introdús hela ba públiku atu buka konsensu hodi determina fatin ba prostituisaun iha Timor-Leste.
“INCSIDA,I-P daudaun ne’e hala’o hela faze konsulta ho komunidade sira, inklui mós lider relijiozu sira iha TL no mós sosiedade sivíl, ho objetivu atu rona sira-nia ideia konstrutivu sira molok harii sentru prostituisaun ida atu prevene kazu pozitivu sira kona-ba HIV/SIDA iha Timor-Leste”, Daniel Marçal dehan ba Tatoli iha nia fatin servisu, Pantai Kelapa, tersa-feira ne’e.
Nia afirma, estabelesimentu fatin prostituisaun ne’e importante tebes atu bele kontrola atividade seksuál livre iha TL. Ho lokalizasaun ba prostituisaun, INCSIDA sei kolabora ho Ministériu Saúde, Ministériu Administrasaun Estatal, Polísia Nasionál Timor-Leste (PNTL), Governu atu kontrola ninia atividade sira, hodi hamenus númeru kazu pozitivu sira kona-ba HIV/SIDA.
“Ita hatene katak agora daudaun kazu pozitivu HIV/SIDA sei aas nafatin iha TL, tanba kontribuisaun husi seksu livre iha fatin hothotu, nune’e estabelese sentru lokalizasaun prostituisaun sei hamenus taxa pozitivu HIV/SIDA tanba fasil atu kontrola.
Nia espera, iha faze konsulta ida-ne’e bele hetan hanoin pozitivu husi komunidade tomak kona-ba estabelesimentu prostituisaun lokalizadu iha futuru atu bele prevene no hamenus kazu pozitivu sira kona-ba HIV/SIDA iha TL.
“Ita rekoñese katak sei iha ema barak ne’ebé la konkorda ho implementasaun lokalizasaun ba prostituisaun ne’ebé hala’o husi INCSiDA, I.P, maibé ita tenke aproveita ida-ne’e hodi prevene no hamenus kazu pozitivu sira kona-ba HIV/SIDA iha Timor-Leste”, nia haktuir.
Aleinde ne’e, INCSIDA mós sei kolabora ho Ministériu Saúde no Ministériu Administrasaun Estatál hodi regula atividade hothotu, otél sira inklui uma aluga atu prevene relasaun seksuál kazál tanba bazeia ba monitorizasaun katak aluga uma no mós otél sira kontribui ba kazu pozitivu HIV/SIDA.
“Ema barak uza atividade masajen, otél, inklui uma aluga hodi halo relasaun seksuál, tanba ne’e INCSIDA, IP sei kolabora ho ajénsia sira ne’ebé iha relasaun ho ne’e atu kontrola sira-nia atividade ho objetivu atu prevene no hamenus kazu pozitivu sira kona-ba HIV/SIDA iha nasaun ne’e”, nia konklui.
Notísia relevante : Infografia: Timor-Leste rejista pasiente HIV/SIDA 1.704 no mate 271
Jornalista : Felicidade Ximenes
Editór : Zezito Silva
