DILI, 02 novembru 2023 (TATOLI) – Pároku Imaculada Conceição Balide, Padre Ângelo Salsinha, iha selebrasaun misa ba loron matebian sira, 02 novembru, husu ba sarani sira atu agradese ba ida-idak ninia matebian ba buat di’ak ne’ebé sira halo ona iha mundu ne’e.
“Ha’u hanoin loron importante ida ne’e sempre hakerek istória iha família hotu-hotu ninia pasadu. Ema ne’ebé ita hadomi iha ita-nian moris tomak, ita-nian inan ka aman sira ne’ebé la hamutuk ona ho ita, ohin sira husik hela memória mai ita atu ita labele haluha sira”, amu Ângelo hatete iha misa ba loron matebian nian, iha semitériu Santa Krús, ohin.
Nia dehan husi domin ne’ebé espresa ba sira ne’e maka ohin sarani hotu husi família ida-idak iha Timór laran tomak hamutuk ho uma kreda selebra misa espesiál iha loron 02 novembru hodi agradese ba sira, ba buat di’ak ne’ebé maka sira halo ona ba ema ne’ebé sei moris iha mundu ne’e.
“Ita mai lori ai-funan, lori lilin hodi husu misa ba sira hanesan asaun de grasa ida ne’ebé ita hato’o ba sira liuhusi na’i Maromak atu agradese ba buat di’ak tomak ne’ebé maka sira halo ona iha sira-nian moris durante ne’e”, realsa.
Ho espresaun domin ne’ebé maka hato’o ba sira liuhusi orasaun no selebrasaun misa eukarístika ne’e atu husu bensaun no grasa husi na’i Maromak ba buat hotu nune’e bele haraik ba sira, liuliu ba matebian sira ne’ebé maka to’o ohin loron sei terus, seidauk hetan felisidade no ksolok. “Karik liuhusi sakrifísiu ne’ebé kada família hato’o liuhusi oportunidade ida ne’e, bele rekompensa matebian sira atu hetan fatin kmanek rohan-la’ek iha reinu lalehan”.
Amu selebrante ne’e mós iha okaziaun ne’e husu ba joven sira atu mantein seguransa iha loron importante ida ne’e.
Nia dehan iha tempu ida ne’e joven sira buka atu halo di’ak ba malu, ba família, kolega no belun sira tanba buat sira ne’e maka sai vokasaun ne’ebé moris iha mundu. “Ita-nian moris iha mundu ne’e ohin ka aban ita lahatene. Tanba ne’e, husi buat di’ak ne’ebé mak presiza halo iha mundu ne’e maka husik hela buat di’ak ruma, nune’e tempu to’o ona husik mundu ne’e, bele rai hela memória di’ak ida hodi marka hela iha inan no aman, família, kolega no maluk sira-ninia fuan”, afirma.
Nu’udar ema sarani, ninia knaar maka buka halo di’ak no buka atu tulun no reza ba família sira ne’ebé maka uluk iha mundu ne’e lahalo di’ak karik, iha momentu ida ne’e hamutuk atu reza ba sira atu iha mundu seluk sira bele hetan moris rohan-la’ek.
Jornalista: Tomé Amado
Editora: Maria Auxiliadora
