Cecilia Rego: “Ami iha Venilale Vila sosa bee bidon ida $1,75”
BAUCAU, 03 novembru 2023 (TATOLI)—Komunidade iha postu administrativu Venilale, munisípiu Baucau, iha tempu bailoron ne’e susar asesu bee-moos no tenke sosa bee hosi karreta tanke bee nian ne’ebé faan bee ba sira.
“Iha ne’e, liuliu iha Venilale Vila laran ne’e probelma bee-moos la’ós buat foun maibé tinan barak ona hasoru probelma bee-moos. Ami tenke ba kuru bee la’o ho distánsia dook to’o iha bee-matan foin kuru bee. Dalabarak mós ami sosa de’it hosi ema faan iha karreta tanke ne’ebé faan kada bidon ida faan ba $1,75 sentavu,” Abitante hosi postu administrativu Venilale, munisípiu Baucau, Cecília Rego, hateten ba Agência Tatoli iha Venilale Vila, sesta ne’e.
Nia hateten, problema fornesimentu bee-moos tinan barak ona kanalizasaun kanu ligasaun hosi foho Mundu Perdidu Ossu-Viqueque mai Venilale ne’e bee maran, tanba instalasaun kanu ne’ebé iha feruzen hotu ona no iha kestaun balun, nune’e afeta bee labele suli to’o iha Venilale Vila.
Abitante ne’e husu ba IX Governu Konstituisionál liuhosi ministériu relevante atu tau atensaun liuliu iha Orsamentu Jerál Estadu (OJE) 2024, atu bele prevee osan hodi tau mós prioridade ba komunidade Venilale hodi solusiona komunidade nia halerik ba bee-moos ne’ebé tinan barak ona hasoru.
Estudante ida, Gabriel Santos, preokupa tebes ba problema bee-moos tanba dalabarak iha kada dadeersan atu ba eskola hodi haris ba eskola, obriga tenke la’o ba bee-matan ne’ebé hos distánsia dook mak foin bele foin asesu bee-moos.
Maibé, nia parte preokupa liután iha tempu bailoron susar atu asesu bee-moos no to’o iha bee-matan mós populasaun sira tenke hadau malu hodi asesu bee-moos, tanba ema ne’ebé atu kuru bee ne’e barak demais.
Nia dehan, durante ne’e rona informasaun katak parte autoridade másimu mós hato’o ona preokupasaun refere ba Governu sentrál atu responde, maibé to’o ohin loron seidauk iha resposta ruma.
Nune’e, iha jerente kompañia lokál balun mós mai halo ona identifikasaun ba bee-matan no halo ona proposta ba ministériu relevante maibé to’o agora laiha resposta no ninia kontinuidade.
Jornalista : Nelson de Sousa
Editór : Cancio Ximenes
