DILI, 06 novembru 2023 (TATOLI) – Diretór Kliniku Hospitál Nasionál Guido Valadares (HNGV), Marcelino Correia, dehan durante loron boot finadu pasiente ne’ebé mak mai halo tratamentu saúde hamutuk 200, pasiente hirak ne’e iha tanba rezultadu hosi tuda malu no asidente.
”Durante finadu, loron 2 to’o 3, iha novembru pasiente ne’ebé mak mai halo tratamentu saúde iha sala emerjénsia Hospitál Nasionál Guido Valadares, maioria mai tanba hetan asidente motor no tuda malu, sira hetan atendimentu husi profisionál saúde, hira ne’e hamutuk 200”, Marcelino Coreia dehan iha nia kna’ar fatin HNGV, ohin.
Nia akresenta, husi pasiente sira ne’e maioria mai ho asidente motor no mós kazu tuda malu ho fatuk mak mai hetan asisténsia médika iha HNGV.
“Ita-nia emerjénsia HNGV simu kazu asidente motor no tuda malu, entaun ita haree ba kazu sira ne’e kazu kamaan, ne’e mak profisionál saúde sira fó atendimentu ho di’ak no sira rekopera no fila ba uma”, nia informa.
Diretór Kliniku husu ba pasiente sira ne’ebé mak moras kamaan hodi ba halo tratamentu iha fasilidade saúde ne’ebé mak besik tanba HNGV simu pasiente sira ne’ebé mak ho moras komplikasaun.
“Foin daudauk ha’u hetan informasaun husi Xefe Departamentu Emerjénsia katak ita-nia sala emerjénsia agora nakonu, maibé médiku sira kontinua fó tratamentu ba sira to’o rekopera hafoin fila ba uma, tanba ne’e husu ba pasiente sira, se karik kazu kamaan bele halo tratamentu iha fasilidade saúde ne’ebé mak besik”, nia konklui.
Jornalista : Felicidade Ximenes
Editór : Zezito Silva
