BAUCAU, 06 novembru 2023 (TATOLI) – Rezultadu eleisaun komunitária volta dahuluk fó sai aldeia Karanu, suku Uaitame, postu administrativu Quelicai tenke kontinua eleisaun xefe aldeia tanba mosu reklamasaun iha volta dahuluk.
Diretór Sekretariadu Tékniku Administrasaun Eleitorál (STAE) Baucau, Natividade Freitas Guterres, esplika, razaun repete eleisaun lideransa ba xefe aldeia refere tanba rezultadu apuramentu mosu reklamasaun hosi kandidatura sira nune’e konsellu suku deside atu kontinua hakat ba eleisaun volta daruak hamutuk ho lideransa komunitária iha suku Uaitame.
“Suku Uaitame tenke eleisaun fali xefe aldeia Karanu tanba mosu fallansu entaun reklama malu nune’e konsellu suku deside realiza fali iha volta daruak,” Diretór STAE Baucau informa ba Agência TATOLI iha Vila Nova, segunda ne’e.
Alende ne’e, aldeia tolu seluk hanesan Gamana, Sialimu no Gugulai iha ona xefi aldeia eleitu tanba rezultadu apuramentu suku laiha reklamasaun ruma hosi kandidatura hosi aldeia tolu refere.
Nune’e eleisaun komunitária iha suku Uaitame fó-sai kandidatura lideransa komunitária na’in-rua hanesan Celestino Moreira no Cesaltino F Moreira tenke hakat ba volta daruak tanba seidauk atinje pursentu 50+1.
Rezultadu apuramentu suku hosi kandidatura nain-haat Celestino Moreira mak lidera tabela dahuluk ho totál pursentu 40 ka hamutuk eleitór 453, Cesaltino Moreira pursentu 39 ho totál eleitór 446, enkuantu kandidatura rua seluk hanesan Florinda da Silva no Marcos Freitas tenke elemina iha volta dahuluk.
Suku Uaitame hamutuk aldeia haat kompostu Gamana, Sialimu, Gugulai no Karanu ho totál eleitór 1.130 hosi totál populasaun 2.821.
Jornalista : Natalino Belo
Editór : Evaristo Soares Martins
