VIQUEQUE, 06 novembru 2023 (TATOLI)–Ministériu Ensinu Superiér, Siénsia no Kultura liuhosi Komisaun Asesu Engeresu Ensinu Superiór (KAES) hamutuk ho Universidade Nasionál Timor-Lorosa’e (UNTL) no Institutu Politékniku Betano (IPB), hahú loke inskrisaun ba estudante foun asesu ba rejime haat ba tinan akadémiku 2024 iha munisípiu Viqueque.
“Tuir diploma ministeriál kona-ba asesu Ensinu Superiór Públiku ba tinan akadémiku 2024, artigu 14 sub-rejime espesiál, nune’e ohin ita hahú rejistrasaun ba finalista sira ne’ebé hotu iha tinan 2019 to’o 2022. Ami hamutuk ho ekipa UNTL, IPB no Konsellu Veteranu Viqueque maka simu inskrisaun ba rejime haat hanesan espesiál, hakbiit, oportunidade no bolsa parsiál,” Diretór Servisu Edukasaun Viqueque, Domingos Brandão, informa iha ninia knaar fatin, Beloi, segunda ne’e.
Notísia relevante : Estudante Viqueque na’in-269 tuir teste asesu UNTL no IPB
Prosesu inskrisaun finalista ba rejime espesiál realiza iha edifísiu Konsellu Veteranu no rejime tolu seluk iha edifísiu Servisu Edukasaun Viqueque.
“Rejistrasaun hahú segunda ne’e no sei ramata iha sesta (10/11). Kona-ba kuota depende ba instiuisaun rua ne’e, ami fasilita de’it. Nune’e, ami husu ba estudante finalista sira iha Viqueque ne’ebé iha interese hakarak tuir, ami prontu ajuda sira hodi legaliza sertifikadu sira,” nia akresenta.
Tuir planu, ekipa responsável sei fó teste ba estudante sira iha loron 12 dezembru 2023. Kritériu asesu ba rejime sira maka kandidatu sira tenke ramata Eskola Ensinu Sekundáriu iha tinan 4 ba kotuk (2020-2023), tenke iha klasifikasaun mínimu ba matéria espesífiku (UNTL no IPB mak deside kona-ba klasifikasaun mínimu, tenke tuir ezame iha loron 06 to’o 10 novembru iha edifísiu Edukasaun munisipál.
Iha dokumentu, obrigatóriu atu halo inskrisaun ba kandidatura UNTL/IPB kopia dokumentu identifikasaun (Kartaun Eleitorál ka Bilhete de Identidade), kopia diploma Eskola Ensinu Sekundariu legalizadu, foto koloridu 3×4, mapa kór mean ba Ensinu Sekundariu Jerál – Siénsia Sosiál Umanidade (CSH), mapa kór azul ba Ensinu Sekundáriu Jerál – Siénsia Teknolojia (CT), mapa kór matak ba Ensinu Sekundáriu Tékniku-Vokasionál no seluk tan.
Jornalista : Vitorino Lopes da Costa
Editora : Julia Chatarina
