DILI, 06 novembru 2023 (TATOLI)—Ministru Komérsiu Indústria (MKI), Filipus Nino Perreira, hateten Governu buka estabelese akordu kooperasaun ho Governu Índia hodi importa ka hatama foos mai Timor-Leste (TL).
Notísia Relevante: Governu iha kompromisu halo intervensaun estabiliza presu foos
“Índia agora provizoriamente sira hapara kedas la’ós mai Timor de’it, maibé ba nasaun sira seluk komesa kedas iha 20 jullu 2023 ne’e. Ne’ebé, ita loke hela kanál komunikasaun, nune’e atu haree mós kuota balun liuhosi kooperasaun Governu Timor-Leste ho Governu Índia,” nia hateten ba Agência Tatoli iha uma fukun Parlamentu Nasionál (PN), segunda ne’e.
Governante ne’e hateten, antes ne’e ko’alia ona asuntu ne’e inklui asuntu disputa komersiál ho Ministru Negósiu Estranjeiru Índia ne’ebé foin lalais vizita mai iha Timor-Leste hodi ko’alia kestaun ne’e
“Ita halo ona karta ida para liberta, tanba ita iha disputa komersiál ho Índia. Tanba, ita-nia kompañia importadór balun hanesan Lisun, Creative Furak, Perisos no mós Alfa Dili, sira-nia kontainer balun mós sira tahan hela. Ne’ebé, hanoin prosesu liberta ita halo ona bainhira vizita hosi Ministru Negósiu Estranjeiru Índia ne’ebé foin lalais mai iha Timor,” nia dehan.
Nia hateten, atu estabelese akordu kooperasaun entre Governu rai rua atu importa foos mai TL, mak parte TL sei hato’o ida-ne’e ba iha Ministériu Negósiu Estranjeiru no Kooperasaun (MNEK) hodi haree prosesu tuir mai.
Jornalista : Nelson de Sousa
Editór : Cancio Ximenes
