Horta estadia ona iha Brunei
DILI, 06 novembru 2023 (TATOLI) – Prezidente Repúblika, José Ramos Horta akompaña hosi Ministru Negósiu Estranjeiru no Kooperasaun (MNEK), Bendito Freitas, ho delegasaun to’o ona iha Brunei Darusalam iha oras 11:45 kalan ho Aviaun Royal Brunei no simu direta hosi Governante na’in tolu kompostu hosi Ministru Interiór, Ministru Negósiu Estranjeiru, Ministru Ekonomia Dezenvolvimnetu Nasionál Brunei ninian no mós akompaña hosi Embaxador Brunei Darusalam ba Timor-Leste Wan Hadfi Lutfan Bin Haji Abdul Latif.
Iha aeroportu, delegasaun lori kedas Prezidente Repúblika ho kometiva sira ba Hotel Empire Brunei ninian.
“Vizita Estadu ne’e hodi hatán ba konvite husi Sua Majestade Hassanal Bolkiah Ibni Omar Ali Saifudden III, Sultaun Brunei Darussalam”, hatete iha komunikadu ne’ebé Agência TATOLI asesu hosi media Gabinete Prezidente Repúblika (GPR), ohin.
Brunei Darussalam sai hanesan nasaun primeiru ida-ne’ebé estabelese relasaun diplomátika ho Timor-Leste iha loron independénsia 20 maiu 2002.
Tuir ajenda ba vizita Estadu ba loron dahuluk nian, segunda feira (06 Nov. 2023), Prezidente Repúblika, José Ramos-Horta ho nia omólogu, sei hala’o enkontru bilaterál ida ho Sua Majestade, Sultan Brunei Darusalam nian Hassanal Bolkiah ibni Omar Ali Saifudden III, Istana Nurul Iman.
Durante vizita ne’e, Prezidente no Sua Majestade sei testemuña Asinatura Memorandu Entendimentu ida kona-ba Mobilidade Traballu, hodi permite timoroan sira ne’ebé elijivél atu servisu iha indústria sira iha Brunei.
Prezidente Ramos Horta mós sei hala’o palestra iha Universidade Brunei Darussalam, ho tema “Timor-Leste nia viajen difisil ba nasaun viziñu no ninia trajetória ekonómika sosiál”.
Jornalista: Hortencio Sanchez
Editór : Zezito Silva
