Kandidatura xefe suku feto tolu iha Covalima avansa ba segunda ronda
COVALIMA, 06 novembru 2023 (TATOLI)–Sekretáriu Tékniku Administrasaun Eleitorál (STAE) munisípiu Covalima rejista kandida xefe suku feto na’in-tolu (3) avansa hodi kompete ho mane sira iha eleisaun xefe suku segunda ronda.
“Kandidatura xefe suku iha eleisaun xefe suku primeira ronda ne’e iha totál kandidatura feto na’in-16. Maibé, hosi númeru ne’e feto nain-tolu (3) mak avansa hodi kompete iha eleisaun xefe suku segunda volta,” Diretór Sekretáriu Tékniku Administrasaun Eleitorál (STAE) Covalima, Francisco Gusmão, hateten ba Agência Tatoli, iha nia kna’ar fatin, Kampung Baru, segunda ne’e.
Kandidatura xefe suku feto na’in-tolu (3) ne’e hosi postu Administrativu Fatululik iha suku Taroman ho, kandidatura xefesuku feto ho naran Mindarita Alfrida de Jesus, iha postu administrativu Tilomar iha suku Beiseuk ho kandidatura xefe suku naran Domingas da Silva no hosi postu administrativu Tilomar iha suku Maudemo ho naran Maria Fátima.
Molok atu realiza eleisaun xefe suku, STAE Covalima rejista kandidatura xefe suku 164 no hosi númeru ne’e kandidatura xefe suku feto na’in-16 no kandidatura xefe suku mane hamutuuk 148.
Hosi númeru ne’e, bazeia ba rezultadu eleisaun xefe suku iha primeira rond aiha 28 outbru 2023 ne’e, hatudu katak kandidatura xefe suku hamutuk 49 ne’ebé kompostu hosi feto na’in-tolu (3) mak avansa ba eleisaun segunda ronda.
Tuir dadus, kandidatura xefe suku ne’ebé tama iha eleisaun segunda ronda mai hosi postu administrativu Fatululik iha suku Fatululik ho Suku Taroman, postu administrativu Fatumea iha suku Belulik Leten, Fatumea no suku Nanu, postu administrativu Fohorem iha suku Dato Rua no Fohorem
Iha postu administrativu Maucatar iha suku Belekasak, Holpilat, Matai no Ogues, postu administrativu Suai iha suku Beco, Camnasa, Labarai no Suai Loro, postu administrativu Tilomar iha suku Beiseuk, Casabauk, Lalawa no Maudemo no iha postu administrativu Zumalai iha suku Fatuleto, Lepo, Lour, Raimea no Tazhilin.
Aleinde STAE Covalima rejista kandidatura xefe suku ne’ebé tama iha eleisaun segunda ronda daruak, STAE mós rejista kandidatura ne’ebé eleitu iha eleisaun xefe suku primeira ronda iha postu administrativu sira hanesan postu administrativu Suai hosi suku Debos ho naran Agostinho da Silva.
Iha postu administrativu Fohorem hosi suku Dato Tolu eleitu iha primeira ronda ne’e mak xefe suku ho naran Eduardo Benjamin Loro no suku Laktos ne’e iha xefe suku ida naran António Afonso.
Iha postu administrativu Zumalai, STAE Covalima rejista xefe suku ne’ebé eleitu iha primeira ronda ne’e, xefe suku hosi suku Mape ho naran Francisco Pereira, Xefe suku Usecai naran António da Silva no xefe Suku Zulo ho naran João Lopes de Carvalho.
Tuir Kalendáriu eleisaun, eleisaun xefe suku segunda ronda ne’e sei hala’o iha loron 13 fulan-Novembru tinan 2023, nune’e xefe suku foun sira sei simu pose iha loron 28 fulan-novembru tinan-2023.
Jornalista : Celestina Teles
Editór : Cancio Ximenes
