BAUCAU, 06 novembru 2023 (TATOLI) – Sekretariadu Tékniku Administrasaun Eleitorál Munisípiu Baucau kontinua halo preparasaun ba eleisaun komunitária volta daruak.
Diretór Serbisu Munisipál STAE Baucau, Natividade Freitas Guterres, esplika, hafoin eleisaun volta dahuluk finaliza suku 35 mak tenke hakat ba volta daruak hosi suku 59 iha Baucau tanba kandidatura xefe suku sira seidauk manán maioria pursentu 50+1.
“Ita-nia preparasaun, boletín volta daruak aprova ona no sei emprime hela,” Diretór STAE Baucau informa ba Agência TATOLI iha Vila Nova, segunda ne’e.
Tuir planu boletín votu ba volta daruak sei distribui iha loron-09 semana-ne’e nune’e sei kontinua halo pakotementu antes distribui ba kada sentru votasaun ne’ebé tuir kalendáriu sei realiza eleisaun iha loron-13 fulan-ne’e.
Suku 35 refere iha postu administrativu Baguia kompostu suku neen hanesan Alawa Leten, Defa-Uassi, Larisula, Ossohuna, Samalari no Uacala, postu Baucau vila suku hitu hanesan Bahú, Buruma, Caibada, Gariuai, Seiçal, Tirilolo no Triloka.
Postu Laga suku rua hanesan Atelari no Tekinomata, postu Quelecai suku sia hanesan Abafala, Bualale, Lacolio, Lelalai, Macalaco, Maluro, Namanei no Uaitame.
Postu Vemasse suku lima hanesan Loilubo, Ossouala, Uaigae, Uatu-lari no Vemasse tasi no postu Venilale suku neen hanesan Badu-hoo, Baha-mori, Uaioli, Uatu-haco, Uma-ana-ulo no Uma-ana-iku.
STAE Baucau mós sei kontinua distribui materiál ba suku 24 ne’ebé iha ona xefi suku hodi hakat ba eleisaun juventude feto no mane inklui lia-na’in hodi kompleta membru konsellu suku hafoin loron 10 eleisaun komunitária tuir lei-númeru 9/2016 kona lideransa komunitária.
“Sei kontinua ho sistema manuál tanba bainhira iha mundansa entaun tenke muda lei maibé oras eleisaun mak sei muda sedu iha 07:00 dadeer tanba laiha ona rejistrasaun ba kandidatura xefe aldeia no delegadu inklui delegada,” Natividade Guterres akresenta.
Natividade Guterres, argumenta, eleisaun volta daruak sei la’o susesu tanba sei hakerek de’it naran votante nune’e sei hafasil ekipa tékniku sira inklui hotu tuir oras ne’ebé determina ona.
Eleisaun volta dahuluk rezulta suku 24 mak iha ona xefe suku foun hanesan iha postu admistrativu Baguia suku Afaloicai, Haeconi, Alawa karaik no Lavateri.
Postu Baucau vila suku haat hanesan Bucoli, Buibau, Samalari no Uailili, postu Laga suku neen hanesan Libagua, Nunira, Saelari, Sagadate, Samalari no Soba.
Postu Quelicai hamutuk suku neen hanesan suku Abo, Afaça, Baguia, Guruça, Laisorulai de Cima no Laisorulai de Baixo, postu Vemasse hamutuk suku rua hanesan suku Caicua no Ostico, enkuantu postu Venilale suku rua hanesan Uailaha no Fatulia.
Jornalista : Natalino Belo
Editór : Evaristo Soares Martins
