Horta: Sultan Brunei hakarak hametin liután kooperasaun ho TL
DILI, 07 novembru 2023 (TATOLI) – Prezidente Repúblika, José Ramos Horta, hasoru malu ho Majestade Hassanal Bolkiah ibni Omar Ali Saifudden III Sultan ko’alia liu kona-ba oinsa atu hametin liután kooperasaun entre nasaun rua iha área oioin.
“Ha’u hasoru malu primeiru ho Sua Majestade Hassanal Bolkiah ibni Omar Ali Saifudden III Sultan ami ko’alia asuntu lubuk ida kona-ba asuntu bilaterál oinsa atu haree liu ba oinsa atu haklean liután kooperasaun iha área oioin, no hametin liután relasaun nasaun rua ne’e nian”, hatete Horta liuhosi komunikadu ne’ebé Agência TATOLI asesu hosi media Gabinete Prezidente Repúblika, ohin.
Sultan Brunei interesadu no asina kedan akordu kooperasaun tanba kompaña iha Brunei hakarak simu traballadór timoroan ba servisu iha ne’ebá.
“Akordu ami asina ona, sira sei simu timoroan mai servisu iha Brunei, timoroan sira la’os mai atu esplora maibé mai atu servisu iha área oioin liuliu iha ospitalidade, tanba Brunei iha difikuldade ba mão de obra tanba populasaun uitoan no vida ekonomia boot tan ne’e sira presiza tan ita atu ba servisu iha ne’ebá,” hatete Horta.
Aleinde ne’e, Brunei interesadu atu halo investimentu Ótel iha Timor-Leste no dezenvolve fatin turizmu sira hodi kontribui ba dezenvolvimentu nasaun nian.
“Ami ko’alia mós kona-ba Governu rai rua ne’e bele halo parseria atu nune’e setór privadu hosi Brunei no Timor-Leste atu haree hamutuk asuntu importante sira no konkretamente hodi halo investimentu ne’ebé di’ak iha Timor-Leste iha área oioin,” nia relata.
Iha parte seluk ko’alia mós kona-ba oinsa bele haruka joven timoroan ne’ebé iha kapasidade bele ba hala’o estudu iha Brunei.
“Sultan rasik hakarak timoroan sira bele mai eskola iha ne’e, liuliu ba ita nia estudante hirak ne’ebé remata ona lisensiatura bele mai hasai masteradu iha ne’e, ou ita nia médiku sira seidauk iha espesialidade bele mai hasai sira nia espesialidade iha ne’e,” nia hakotu.
Jornalista: Hortencio Sanchez
Editór : Zezito Silva
