COVALIMA, 07 novembru 2023 (TATOLI)–Xefe Unidade EDTL. E,P Covalima Alexandre Seran, hateten iha Covalima ne’e komunidade suku Dato Tolu, postu administrativu Fohorem mak seidauk asesu eletrisidade, maibé komunidade maiória ne’e asesu ona eletridade.
Nia hateten, maske falta suku Dato Tolu mak seidauk asesu eletrisidade maibé agora daudaun ne’e kompañia Holpilat harii ona riin eletrisidade no hein prosesu tuir mai.
Tuir nia, munisípiu Covalima iha nia postu administrativu hamutuk Fatululik, Fatumea, Fohorem Tilomar, Maucatar, Suai no Zumalai ho nia suku 30 hosi númeru ne’e suku 29 asesu ona eletrisidade maibé falta suku Dato Tolu mak seidauk.
“Suku Dato Tolu ne’ebé pertense ba postu administrativu Fohorem mak seidauk asesu eletrisidade, maibé agora tama ona iha faze konstrusaun, tanba kompañia Holpilat harii ona ai-riin eletrisidade no monta ona trafo, hein atu halo inspesaun enerjia eletrisidade, nune’e ahi bele lakan,” Alexandre Seran hateten ba Agência Tatoli, iha nia servisu fatin, Bairru Costa, tersa ne’e.
Bazeia ba dadus hatudu. munisípiu Covalima iha nia suku 30, aldeia 149 hosi númeru ne’e komunidade aldeia 123 asesu ona eletrisidade, aldeia 13 tama iha faze konstrusaun no aldeia 13 tama iha faze levantamentu dadus.
Aldeia 13 ne’ebé tama iha faze konstrusaun mak hanesan iha postu administrativu Zumalai iha suku Lour, aldeia Laegatal, Uluk Lolo, Tilis no Salasa, postu administrativu Maucatar iha suku Belekasak aldeia Busadao, Ila no Gasolo.
Iha postu administrativu Fohorem iha suku Dato Tolu, iha aldeia Fatuk Kabuar Leten, Fatuk Kabuar kraik no aldeia Natardik no postu administrativu Fatululik, aldeia Makous, Fatuloro no Holba, postu administrativu Tilomar, Suai no Fatumea ne’e komunidade asesu ona eletrisidade.
Aleinde ne’e, aldeia ne’ebé tama iha faze levantamentu dadus hamutuk aldeia 13 hanesan iha postu administrativu Zumalai, suku Lour iha aldeia Somo Kanua ho Pelet, iha suku Lepo, aldeia Baulolo ho Horba, iha suku Mape iha Aldeia Polo ho Daru no iha suku Fatuleto iha aldeia Biata ho aldeia Basana.
Postu administrativu Suai iha suku Beco, aldeia ne’ebé tama iha faze lavantamentu dadus hanesan aldeia Tobur, Teda, Tudulpo, Halik no Leowalu.
Jornalista : Celestina Teles
Editór : Cancio Ximenes
