KRO aprova orsamentu CNE millaun $8.8
DILI, 07 novembru 2023 (TATOLI)–Komité Revizaun Orsamentu (KRO), segunda ne’e (06/11/2023) aprova ona orsamentu ba Komisaun Nasionál Eleisaun (CNE-sigla portugés) hamutuk millaun $8.8 ($8,858,619).
“Totál orsamentu ne’ebé hetan aprovasaun hosi KRO ba CNE iha tinan 2024 hamutuk $8,858,619 ne’ebé fahe ba saláriu no vensimentu $1.453,106, bens no servisu $1.235,673, kapitál menór hamutuk $150,000 no transferénsia públika ho totál orsamentu 6.019,840,” refere komunikadu ne’ebé Agência Tatoli asesu, tersa ne’e.
Orsamentu hirak ne’e atu bele finánsia ba atividade edukasaun sívika, organiza semináriu, manutensaun ba véikulu no edifísiu, formasaun no kapasitasaun, orsamentu viajem lokál no internasionál no atividade seluk tan importante sira.
CNE mós aprezenta nia planu atu halo instalasaun ba sentru edukasaun sívika no promove demokrásia nu’udar memória instituisionál, nune’e futurumente bele sai mós fatin atu ajuda ema hetan informasaun ho importante, liuliu ba joven sira -ne’ebé mak interligadu ho ezisténsia demokrásia iha Timor-Leste.
Primeiru Ministru, Kay Rala Xanana Gusamão, apoiu no apresia ho vizaun CNE nian ne’e no solisita ba CNE atu bele servisu makaas hodi bele buka referénsia globál ba ezisténsia demokrásia iha ASEAN, Afrika no Amérika hodi hariku informasaun sira kona-ba prinsípiu no valór demokrásia nian, maibé husu atu bele prioritiza iha tinan 2025.
Iha aprezentasaun ne’e, Prezidente CNE Jose da Costa Belo, akompañadu hosi Vise Prezidente CNE Domingos Barreto, Sekretária Odete Belo hamutuk ho dirijente Sekretariadu Jerál CNE no Tékniku sira mak marka prezensa iha salaun auditoriu Ministeriu das Finansas hodi halo aprezentasaun no justifika ba orsamentu fiskal 2024, perante Komisaun Revizaun Orsamentu (KRO) ne’ebé prezide direta hosi Primeiru-Ministru, Kay Rala Xanana Gusmão.
Jornalista : Osória Marques
Editór : Cancio Ximenes
