MESSK hahú loke inskrisaun ba estudante finalista Covalima asesu UNTL-IPB
COVALIMA, 07 novembru 2023 (TATOLI)–Ministériu Ensinu Superiór Siénsia no Kultura (MESSK) hahú loke inskrisaun ba estudante finalista (foun) iha Covalima atu asesu Universidade Nasionál Timor-Leste (UNTL) no Institutu Politékniku Betanu (IPB), iha 06 novembru 2023.
Prosesu inskrisaun ne’e fahe ba rejime hanesan rejime espesiál hakbiit (ba oan ki’ak) no veteranu no martir nia oan no rejime jerál hodi haree ba valór estudante finalista depende sira hili kursu.
“Ami hala’o prosesu inskrisaun estudante sira-ne’ebé finaliza ona estudu iha ensinu sekundáriu atu asesu ba UNTL no IPB iha munisípiu Covalima,” Koordenadora ekipa rejistu Asesu engresu ba UNTL, Florentina Guterres,” hateten ba Agência Taloli, iha edukasaun Covalima, Santa Rosa, tersa-ne’e.
Prosesu inskrisaun ne’e, hahú iha loron 6 fulan-novembru ne’ebé sei ramata iha loron 10 fulan-novembru 2023 ne’ebé komisaun la limita atu simu estudante finalista ne’ebé atu kontinua nia estudu iha universidade.
Ekipa tékniku rejistu edukasaun Covalima, João Martins, hateten durante hala’o inskrisaun hahú loron 6 fulan-novembru komisaun rejista ona estudante finalista atu asesu UNTL-IPB.
“Ami rejista kandidatu finalista atu asesu ba UNTL no IPB hodi fahe ba rejime oportunidade na’in-10, rejimie hakbiit na’in-rua (2) maibé rejime ba veteranu martir nia oan seidauk iha,” nia dehan.
Kandidatu ne’ebé komisaun rejista laiha trajetu ba kandidatura sira komisaun halo inskrisaun de’it bainhira kandidatura estudante atu asesu UNTL-IPB.
“Ami laiha trajetu atu rejista estudante sira-nia naran ne’ebé atu kontinua estudu depende ita-nia estudante sira mai halo rejistu sira-nia naran sei tuir teste hahú 12 fulan-dezembru to’o loron 14 fulan-dezembru” nia hateten.
Ekipa komisaun halo inskrisaun ba estudante ne’ebé atu asesu rejime hakbiit, presiza lori dokumentu sira hanesan, deklarasaun hosi xefe suku, hafoin lori ba Sentru solidariedade Sosiál hodi hasai deklasaun, diploma ensinu sekundáriu no sei haree tuir departamentu ne’ebé estudante sira hili.
Estudante finalista atu asesu rejime oportunidade, se de’it bele rejistu maibé presiza lori dokumentu sira hanesan, diploma ensinu sekundáriu no Tekniku Vokasionál, Kartaun Eleitorál, Billete Identidade no sertidaun RDTL
Rejime ba veteranu martir nia oan sira presija lori dokumentu sira hanesan lori deklrasaun hosi konsellu veteranu munisipál no hasai nia aman nia fixa veteranu.
Tuir dadus iha loron 06 novembru ekipa komisaun rejista ona estudante finalista na’in-12 ne’ebé fahe ba rejimr oportunidade na’in-10 no rejime hakbiit na’in-rua (2) maibé veteranu no martir nia oan seidauk iha estudante.
Jornalista : Celestina Teles
Editór : Cancio Ximenes
