iklan

EKONOMIA, BAUCAU, HEADLINE, MUNISÍPIU

SEKoop destaka funsionáriu na’in-sia iha Baucau

SEKoop destaka funsionáriu na’in-sia iha Baucau

Sekretáriu Estadu Kooperativa, Arsenio Perreira hamutuk ho Prezidente Autoridade Munisipál Baucau, Olivio Freitas foto hamutuk ho funsionáriu na’in-sia iha autoridade administrasaun munisipál Vila Nova, tersa (07/11). Imajen Tatoli/Natalino Belo.

BAUCAU, 07 novembru 2023 (TATOLI) – Governu liuhosi Sekretáriu Estadu Kooperativa (SEKoop) tersa ne’e, destaka funsionáriu hamutuk na’in-sia hodi reforsa serbisu iha munisípiu Baucau to’o postu administrativu.

Sekretáriu Estadu Kooperativa, Arsénio Pereira da Silva, esplika, objetivu prezensa funsionáriu hirak-ne’e bazea ba planu programa governu nian kona-bá desentralizasaun administrativa iha munisípiu hotu nune’e bele aliña tuir serbisu iha administrasaun hosi munisípiu to’o postu administrativu.

“Ami hahú hosi Baucau, aban kontinua iha Lautém to’o munisípiu seluk atu integra funsionáriu sira iha Dili mai serbisu direitamente iha munisípiu atu hakbesik no serbí povu iha área rurál,” Sekretáriu Estadu Kooperativa hateten iha Vila Nova.

Funsionáriu na’in-sia ne’e komposta hosi feto na’in-haat no mane na’in-lima sei reforsa serbisu SEKoop iha nível munisípiu to’o rurál hanesan akompaña atividade setór kooperativa hotu ne’ebé eziste iha suku, postu hodi hatene kona-ba difikuldade hodi hato’o ba nasionál nune’e bele hakmaan serbisu kooperativa.

Alende ne’e, funsionáriu hirak-ne’e tenke ajuda serbisu hotu iha nível administrasaun nian hanesan iha munisípiu to’o postu administrativu neen iha munisípiu Baucau.

Tuir planu, SEKoop sei kontinua destaka funsionáriu kazuál no ajente iha nasionál sei iha faze avaliasaun nune’e tinan-2024 sei kompleita tán iha Baucau ne’ebé tuir tarjetu hamutuk na’in-20.

“Parte rekursu umanu sei halo mapeamentu no tuir planu sei destaka hotu ba postu adminsitrativu sira,” Arsenio Perreira akresenta.

Prezidente Autoridade Munisipál (PAM) Baucau, Olivio ‘Bou-lesa’ Freitas, hateten, prezensa funsionáriu hirak-ne’e sei ajuda autoridade munisipál iha área kooperativa tuir serbisu tarefa ne’ebé estabelese ona.

“Sira-nia knar espesífiku simu hosi nasionál atu implementa iha Baucau hanesan iha postu, ha’u husu ona nune’e orienta tuir knaar ne’ebé iha,” Bou-Lesa hateten.

Jornalista    : Natalino Belo 

Editór          : Evaristo Soares Martins 

iklan
iklan

Leave a Reply

iklan
error: Content is protected !!