TDS aplika prizaun preventiva ba arguidu JHD komete krime ofensa grave
COVALIMA, 07 novembru 2023 (TATOLI)–Tribunál Distritál Suai (TDS) hala’o julgamentu primeiru interrogatóriu judisiál iha loron (6/11) no iha loron (7/11) lee despaixu hodi aplika medida prizaun preventiva ba arguidu JHD ne’ebé komete krimi ofensa grave.
Kazu ne’e akontese, iha suku Maliubu, postu administrativu Bobonaro, munisípiu Bobonaro iha loron 2 fulan-novembru tinan 2023.
“Ohin liuhosi julgamentu lee despaixu hodi aplika medida koasaun, tanba segunda (06/11) ne’e halo julgamentu primeiru interrogatóriu ba arguidu nain rua ho inisiál HC no JHD, ne’ebé entrega aan ba Polísia Nasionál Timor-Leste munisípiu Ainaro, iha loron sábadu (4/11) hodi detein arguidu nain-rua,” Defonsór Públiku, Domingos dos Santos, hateten ba jornalista iha Tribunál Distritál Sua.
Audénsia julgamentu liuhosi primeiru interrogatóriu Ministériu Públiku (MP) indika ba arguidu hodi komete krime ofensa grave ne’ebé previstu iha kódigu penál artigu 146.
Tribunál Distritál Suai aplika prizaun preventiva ba arguidu ho inisiál JHD no HC aplika TIR, tanba arguidu na’in-rua hasoru vítima ho inisiál R iha Maliubu
Hafoin rona despaixu ba arguidu na’in-rua, arguidu ho inisiál HC hetan medida koasaun Termu Identidade Rezidénsia (TIR) no Arguidu JHD aplika medida koasaun prizaun preventive, no kona-ba nia prosesu ne’e atu kontinua k alae, ida-ne’e depende investigasaun hosi Ministériu Públiku (MP).
Audiénsia Julgamentu ne’e prezide hosi juis singulár Naasson M.A.M.D Sarmento, Ministériu Públiku Rafael Jeronimo Gusmão no Arguidu hetan asisténsia legál hosi Defensór Públiku Domingos dos Santos.
Jornalista : Celestina Teles
Editór : Cancio Ximenes
