OÉ-CUSSE, 08 novembru 2023 (TATOLI – Autoridade Rejiaun Administrativa Espesiál Oé-Cusse Ambeno (RAEOA) liuhosi Sekretáriu Rejionál ba Asuntu Agrikultura aloka $105,535.03 hosi Orsamentu Jerál Estadu (OJE) 2023 hodi harii kanál irrigasaun sekundér unidade rua iha área natar sira iha suku Lalisuk, sub-rejiaun Pante Makasar.
Sekretáriu Rejionál ba Asuntu Agrikultura, José Eta, hateten, projetu konstrusaun kanál irrigasaun rua ne’e la tama ba iha Planu Anuál diresaun nian, maibé tanba nesesidade natar na’in sira maka Autoridade RAEOA liuhosi Diresaun Rejionál Agrikultura prevee orsamentu atu harii iha área natar sira iha Aenmat no Oéleu-Naek.
“Iha tinan ne’e mós, prevee hela orsamentu atu halo kanalizasaun irrigasaun ba kanál sekunder rua atu fasilita área natar sira iha Aenmat no mós natar sira iha Oéleu-Naek, agora aprovizionamentu públika ona rezultadu tenderizasaun (konkursu públiku) iha kampañia rua manán ona, hein de’it atu selebra kontratu atu hahú ezekuta,” José Eta, hateten iha Oe-Cusse, kuarta ne’e.
Nia informa, konstrusaun kanál irrigasaun sekundér iha área natar Aenmat ho nia médida metru 500, sei ezekuta hosi kompañia Nun-Mabun Unipesoál Lda ho valór hamutuk $51,788.59.
Nune’e mós konstrusaun kanál irrigasaun sekundér iha área natar Oéleu-Naek ho nia medida metru 520, sei ezekuta hosi kompañia Bocbobo Unipesoál Lda ho valór $53,746.44.
Notísia relevante: http://projetu kanal Irigasaun iha Lifau atinje 60%
Jornalista: Abílio Elo Nini
Editór: Evaristo Soares Martins
