DILI, 08 novembru 2023 (TATOLI) – Prezidente Repúblika, José Ramos Horta, hamutuk ho delegasaun hala’o vizita ba Parke Rekreativu ka ‘Taman Rekreasi Bukit Paktoi’ iha Temburong, Brunei Darussalam.
Parke ne’e hanesan ezemplu primeiru ida hosi Brunei nia kompromisu atu prezerva no konserva ninia ambiente naturál, aliña ho esforsu globál atu kombate mudansa klimátika.
Durante vizita ne’e, Prezidente Ramos Horta hetan informasaun kona-ba inisiativa sira ba jestaun no konservasaun parke nian, inklui programa reforestasaun, protesaun ba espésie sira ne’ebé iha perigu no promosaun prátika turizmu sustentável sira.
“Governu Brunei nia dedikasaun ba protesaun ambientál, admira ba parke ne’e nia rai-matak no biodiversidade oioin”, hatete Horta liuhosi komunikadu ne’ebé Agência TATOLI asesu hosi media Gabinete Prezidente Repúblika, ohin.
Prezidente nia vizita ba parke ne’e hatudu importánsia husi kolaborasaun internasionál hodi hatán ba mudansa klimátika.
Timor-Leste no Brunei, maske ho distánsia jeográfika maibé bele fahe objetivu komún ida atu proteje sira-nia ekosistema ba jerasaun sira iha futuru.
Jornalista: Hortencio Sanchez
Editór : Zezito Silva
