CJMB sei organiza selebrasaun loron nasionál juventude iha Baucau
BAUCAU, 08 novembru 2023 (TATOLI) – Sentru Nasionál Juventude Munisípiu Baucau (CMJB, sigla portugés) sei organiza loron nasionál juventude durante loron-haat iha munisípiu Baucau.
Prezidente Komisaun Organizadora atuál Diretór Ezekutivu Sentru Juventude Munisípiu Baucau, Manuel de Carvalho Marques, esplika, inisiativa selebra loron nasionál juventude 12 novembru maihosi sentru juventude Baucau ne’ebé kolabora ho Ministériu Juventude Desportu Arté no Kultura tanba konsidera presiza kria atividade hodi envolve organizasaun juventude hotu nune’e estabelese komisaun organizadora hodi selebra loron importante refere.
“Preparasaun atinje ona pursentu 80 tanba kada atividade nia kondisaun lahanesan,” Prezidente Komisaun Organizadora hateten iha Vila Nova, kuarta ne’e.
Komisaun Organizadora deside ona atividade hodi selebra loron nasionál juventude durante loron-haat hanesan limpeza jerál, diskursu públiku, semináriu, kalan reflesaun, feira, desportu, misa, marsa dame no palku animasaun.
“Ita-nia intensaun hakarak prepara juventude nu’udar futuru ba nasaun entaun presiza mentaliza sira liuhosi atividade hanesan diskursu públiku,” Manuel de Carvalho akresenta.
Atividade hirak refere fahé ba loron-dahuluk hahú ho limpeza jerál hosi Vila Antiga no Vila Nova, diskursu públiku sei partispa hosi estudante ensinu sekundária to’o universitáriu iha uma dame loron-09 novembru.
Alende ne’e, iha loron-10 novembru sei kontinua semináriu inklui kalan reflesaun iha uma laku Igreja parókia Santo António, feira durante loron-tolu hosi 10-12 iga Sentru Konvensaun Baucau (CCB, sigla portugés), jogu amizade iha loron-11 no insera iha loron-12 ho atividade hanesan misa iha Igreja parókia São José Vila, marsa no kari ai-funan iha semitériu suku Gariuai inklui ikus palku animasaun iha CCB Vila Antiga.
Komisaun Organizadora hala’o atividade refere hetan orsamentu hamutuk $7.450 ne’ebé apoia hosi Administrasaun Munisipál Baucau hamutuk osan $700 inklui Ministériu Edukasaun Juventude Arte no Kultura hamutuk $6.750 ne’ebè sei aloka mos ba kada postu admistrativu $1.000.
Jornalista : Natalino Belo
Editór : Evaristo Soares Martins
