HNGV Ezekuta ona millaun $8.2 hosi OJE 2023
DILI, 08 novembru 2023 (TATOLI) – Diretór Administrasaun Finansas no Lojístika iha Hospitál Nasionál Guido Valadares (HNGV), Raul Humberto Gama, informa orsamentu ne’ebé Governu aloka ba HNGV iha tinan 2023 hamutuk millaun $13.5, husi orsamentu ne’e, ezekuta ona millaun $8.2.
“Kona-ba ezekusaun orsamentu 2023, to’o fulan novembru, ita ezekuta ona osan hamutuk millaun $8.2, ho ninia pursentu 59%, inklui obligasaun 5% ho komitmentu 5%, tanba ne’e, ita-nia estimativu ezekusaun sei atinje to’o fim do ano, porvolta 60% ka 70 %”, nia dehan ba jornalista iha HNGV, ohin.
Nia hateten, saláriu no vensimentu atinje ona 70%, obligasaun ba projetu sira ne’ebé hothotu akompania liga ba espasaun, tanba ne’e mak iha fim do ano bele ezekuta to’o iha ne’eba.
“Depois iha foin lalais debate kona-ba orsamentu retifikativu, entaun aprovasaun retifikativu mai ospitál atu bele selu dívida balun hamutuk $464.271, entaun ida-ne’e mak orsamentu retifikativu ne’ebé foin daudauk aprova mai HNGV”, nia informa.
Nia haktuir, planu orsamentu husi HNGV propoin ba Ministériu Finansas 2024, purvolta millaun $18, maibé aprova de’it millaun $10.8.
“Entaun Minisériu Finansas sei fó oportunidade ba ospitál hodi bele identifika atu halo proposta adisionál ne’ebé, ita submete ba Komite Revizaun Orsamentu (KRO) hamutuk millaun $7.2 maibé aprova de’it millaun $2.7”, nia konklui.
Jornalista : Felicidade Ximenes
Editór : Zezito Silva
