Horta ho delegasaun kontinua vizita Filipina
DILI, 08 novembru 2023 (TATOLI) – Prezidente Repúblika, José Ramos Horta, ne’ebé akompaña hosi Ministru Negósiu Estranjeiru no Kooperasaun (MNEK), Bendito dos Santos Freitas, kuarta ne’e, ho delegasaun kontinua hala’o vizita estadu ba Manila-Filipina, hafoin konklui vizita ofisiál iha Brunei Darussalam ne’ebé hahú husi loron 06 to’o 07 novembru.
Xefe Estadu, Ramos-Horta ho delegasaun to’o iha Filipina iha tuku 14:15 oras Filipina loro-kraik ho Aviaun Royal Brunei, ne’ebé simu direta hosi Embaxador Dezignadu Timor-Leste ba Filipina, Marciano da Silva no Embaxadora Filipina iha Timor-Leste, Belinda Mariano Ante.
Hosi aeroportu, delegasaun lori kedas Prezidente Repúblika ho komitiva sira diretamente ba iha Hotél Raffles, Makati”.
“Ajenda Prezidente Repúblika, sei hala’o enkontru bilaterál ho nia omólogu Prezidente Repúblika Filipina, Ferdinand R. Marcos Jr ho entidade importante seluk tan”, hatete liuhosi komunikadu ne’ebé Agência TATOLI asesu hosi media Gabinete Prezidente Repúblika (GPR), ohin.
Aleinde ne’e, Xefe Estadu mós sei halo palestra iha Universidade “Ateneo de Manila” Filipina ho tema “Peace Building, Nation Building”.
Iha oportuniade ne’e, Prezidente Repúblika, halo mós Vizita ba sede Banku Dezenvolvimentu Aziátiku.
Jornalista: Hortencio Sanchez
Editór : Zezito Silva
